Abu Dabi merkezli dövlət investisiya şirkəti MGX, dünyanın ən böyük kriptovalyuta birjası olan Binance-da 2 milyard dollar dəyərində minoritar pay aldığını açıqladı.
GDP xəbər verir ki,şirkətlərin birgə press-relizində bildirildiyinə görə, bu investisiya stabilkoinlərlə təmin olunacaq və bu, kriptovalyuta sahəsində indiyə qədər edilmiş ən böyük investisiyalardan biri kimi qiymətləndirilir.
MGX, keçən il Abu Dabi hökuməti tərəfindən süni intellekt (AI) texnologiyalarına investisiyaları artırmaq məqsədi ilə yaradılıb. Şirkət, sentyabr ayında BlackRock və Microsoft ilə birlikdə Qlobal AI İnfrastruktur İnvestisiya Tərəfdaşlığını (GAIIP) təsis edərək, 30 milyard dollar cəlb etməyi planlaşdıran bir AI infrastruktur investisiya fondu yaratmışdı.
Binance isə 260 milyondan çox qeydiyyatdan keçmiş istifadəçisi ilə dünyanın ən böyük kriptovalyuta birjası olaraq tanınır. Bu əməkdaşlıq, həm MGX-in texnologiya və innovasiya sahəsindəki mövqeyini gücləndirməyi, həm də Binance-ın qlobal kriptovalyuta bazarındakı liderliyini davam etdirməyi hədəfləyir.
Bu investisiya, kriptovalyuta və blokçeyn texnologiyalarının inkişafına dəstək verən strateji bir addım kimi qiymətləndirilir. MGX və Binance arasındakı bu tərəfdaşlıq, həm də BƏƏ-nin texnologiya və innovasiya sahəsindəki ambisiyalarını bir daha nümayiş etdirir.