Azərbaycan Mərkəzi Bankının (AMB) sədri Taleh Kazımov faiz dəhlizinin parametrləri ilə bağlı qərarına həsr olunmuş mətbuat konfransında manatın dəyərinin formalaşma mexanizmi və bank sektorunda likvidlik məsələləri barədə geniş açıqlama verib.
GDP-nin məlumatına görə, Kazımov bildirib ki, keçmişdə Mərkəzi Bank fərqli pul siyasəti həyata keçirirdi və bank sektorunda izafi likvidlik mövcud idi. “Vəsaitlər hesablarda qalırdı, heç bir dəyər formalaşmırdı. Mərkəzi Bank öz pul siyasətini dəyişdirdikdən sonra həyata keçirdiyi islahatların nəticəsi olaraq artıq hər bir manatın dəyəri formalaşıb,” – deyə AMB sədri qeyd edib.
Taleh Kazımov manatın dəyəri anlayışına aydınlıq gətirib: “Bəzən manatın qiyməti nədir sualına ‘manatın qiyməti 1.7-dir’ cavabı verilir. Bu, manatın qiyməti deyil. Manatın qiyməti faizdir, Mərkəzi Bankın formalaşdırdığı faizdir. Qiymət faizlə ölçülür, digər ölkənin valyutasına nisbəti ilə ölçülmür.”
AMB sədri vurğulayıb ki, bu gün Azərbaycanda AZİR indeksi mövcuddur və risksiz şəkildə manatın bir və üç illik dəyərini müəyyən etmək mümkündür.
Kazımovun sözlərinə görə, manatın qiymətinin formalaşması üçün izafi, istifadəsiz likvidlik bazardan çıxarılaraq sterilizasiya edilib. “İndi banklar hər bir manata görə əhaliyə, sahibkarlara pul ödəyirlər. Bu düzgündür. Məhz bunun nəticəsində banklar bazara çıxıb 41 mindən çox yeni əmanətçini sektora cəlb etdilər,” – deyə AMB sədri vurğulayıb.
Taleh Kazımov həmçinin qeyd edib ki, sektorda izafi likvidliyin olması problemdir, çünki bu, Mərkəzi Bankın faiz dəhlizi transmissiyasının çalışmadığını və təsirinin olmadığını göstərir.