Azərbaycan Respublikası Dövlət Neft Fondunun (ARDNF) İcraçı direktorunun müavini Bəhruz Bəhramov “PowerChina Resources Ltd.“ şirkətinin İdarə heyətinin sədri Conq Hayşyanqın rəhbərlik etdiyi nümayəndə heyəti ilə görüş keçirib.
GDP Neft Fonduna istinadla xəbər verir ki, görüşdə Azərbaycan ilə Çin Xalq Respublikası arasında strateji tərəfdaşlıq çərçivəsində investisiya və əməkdaşlıq imkanları, xüsusilə bərpa olunan enerji və infrastruktur layihələri sahəsində birgə fəaliyyət perspektivləri müzakirə olunub.
Conq Hayşyanq rəhbərlik etdiyi şirkətin beynəlxalq təcrübəsi və Azərbaycanda həyata keçirilən layihələr barədə məlumat verərək, ölkənin yaşıl enerji gündəliyinə dəstək göstərməkdə maraqlı olduqlarını bildirib.
Bəhruz Bəhramov isə ARDNF-in beynəlxalq tərəfdaşlarla strateji əməkdaşlığın genişləndirilməsinə xüsusi önəm verdiyini qeyd edib. O, Fondun enerji keçidinə töhfə verən təşəbbüsləri investisiya strategiyasına və risk-gəlirlilik profilinə uyğun şəkildə dəyərləndirməyə hazır olduğunu vurğulayıb.
Qeyd edək ki, “PowerChina Resources Ltd.“ – “POWERCHINA” Qrupunun əsas xarici investisiya platformasıdır və bərpa olunan enerji layihələrinin investisiyası, inşası və istismarı sahəsində ixtisaslaşıb. Şirkət Asiya, Avstraliya, Avropa və Afrikanın müxtəlif ölkələrində həyata keçirdiyi layihələrlə dayanıqlı enerji təminatına, yerli məşğulluğun artırılmasına və ekoloji həllərin təşviqinə töhfə verir.
2024-cü ilin sonuna olan məlumata görə, “PowerChina Resources Ltd.“ 20 ölkə və regionda 48 törəmə şirkətə malikdir və ümumi gücü 5227 MVt olan 18 layihə istismar və ya tikinti mərhələsindədir.
