Mərkəzi Bankın (AMB) sədri Taleh Kazımov qurumun faiz dəhlizinin parametrləri ilə bağlı qərarına həsr olunmuş mətbuat konfransında bildirib ki, Avropa Yenidənqurma və İnkişaf Bankının (AYİB) manatla istiqraz buraxması onların Azərbaycan iqtisadiyyatına və manata inamını, həmçinin Mərkəzi Bank tərəfindən pul siyasəti istiqamətində həyata keçirilən islahatları dəstəklədiyini göstərir.
“AYİB-in AZİR indeksini özləri üçün faiz dərəcəsi kimi qəbul etməsi artıq bizim üçün də böyük bir nailiyyətdir” – deyə Kazımov qeyd edib.
AMB sədri vurğulayıb ki, bu layihəni Mərkəzi Bank olaraq 1 il yarımdır planlaşdırırlar: “Bu, bizim kapital bazarlarının inkişafı istiqamətində aparılan islahatlardan biridir. Biz daxili tələblərimizi, qaydalarımızı ona uyğun etdik ki, artıq beynəlxalq maliyyə institutları rahatlıqla Azərbaycan kapital bazarlarında yerli valyuta – manatda istiqraz buraxa bilsinlər.”
Kazımovun sözlərinə görə, bu həm kapital bazarlarının inkişafına töhfə verəcək, çünki əlavə alətdir: “Tarixdə ilk dəfədir ki, üzən faiz dərəcəsində istiqraz buraxılır və eyni zamanda Mərkəzi Bankın istinad etdiyi indeksə əsaslanır.”
O, həmçinin qeyd edib ki, bu real sektorun inkişafı üçün də vacibdir: “Beynəlxalq maliyyə institutları Azərbaycan sahibkarlarını müxtəlif məhsullar vasitəsilə maliyyələşdirirlər. Əksər hallarda bu maliyyələşmə xarici valyutada həyata keçirilir. Bu valyutanı manata çevirdikdə kreditin faiz xərcləri yüksək olur. Belə bir kanalın yaradılması real sektorun manatla maliyyələşdirilməsi üçün daha aşağı faizli kreditlərin mövcud olması deməkdir. Bu, şübhəsiz ki, biznesin maliyyələşdirilməsi üçün böyük töhfədir.”
Kazımov yekunlaşdırıb: “İlk məbləğ 50 milyon manatdır. Gözləntimiz odur ki, bu, yalnız başlanğıcdır.”