Azərbaycan Respublikası Dövlət Neft Fondu (ARDNF) nümayəndə heyəti İcraçı direktor İsrafil Məmmədovun rəhbərliyi altında 27-28 oktyabr tarixlərində Səudiyyə Ərəbistanının Ər-Riyad şəhərinə işgüzar səfər edib.
GDp xəbər verir ki, səfər çərçivəsində ARDNF nümayəndə heyəti “The Arab Energy Fund”, “Starwood Capital Group”, “Gulf Islamic Investments”, “Investindustrial”, “Warburg Pincus”, “Luma Group”, “CVC Capital Partners”, “Franklin Templeton”, “Brookfield Asset Management”, “BTG Pactual”, “China Investment Corporation” və “FSI (Fondo Strategico Italiano)” kimi dünyanın aparıcı investisiya və maliyyə qurumlarının rəhbərləri ilə görüşlər həyata keçirib.
Görüşlərdə beynəlxalq əməkdaşlığın genişləndirilməsi, birgə investisiya layihələri, yeni bazarlarda fəaliyyət, uzunmüddətli kapitalın idarə edilməsi, dayanıqlı və məsuliyyətli investisiya modelləri ilə yanaşı suveren sərvət fondlarının qlobal iqtisadiyyatdakı rolu müzakirə olunub.
İsrafil Məmmədov həmçinin 28 oktyabr tarixində Ər-Riyadda təşkil olunan “Future Investment Initiative 2025” (FII9) beynəlxalq konfransı çərçivəsində “Yeni iqtisadi reallıqda suveren sərvət və institusional kapital” mövzusunda panel müzakirəsində çıxış edib.
Məmmədov çıxışında Azərbaycan Dövlət Neft Fondunun investisiya strategiyasında dayanıqlı idarəetmə, risklərin effektiv idarə olunması və uzunmüddətli dəyər yaradılmasının əsas prinsiplər kimi qəbul edildiyini vurğulayıb. O, həmçinin qeyd edib ki, Fondun fəaliyyətində texnoloji innovasiyaların və enerji keçidi proseslərinin dəstəklənməsi prioritet istiqamətdir.
Panel müzakirəsində həmçinin “The TCW Group, Inc.” şirkətinin Prezidenti və Baş icraçı direktoru Keti Kox, “Liberty Strategic Capital” şirkətinin təsisçisi və baş tərəfdaşı, ABŞ-ın keçmiş Maliyyə naziri Stiven T. Mnuçin, “China Investment Corporation” şirkətinin İcraçı vitse-prezidenti Şaoçin Jan və “The National” nəşrinin geoiqtisadiyyat üzrə redaktoru Manas Krenni də çıxış etməklə suveren fondların mövcud qlobal iqtisadi şəraitdəki roluna dair qiymətli fikir və təhlillərini bölüşüblər.
Səfər Azərbaycan Dövlət Neft Fondunun beynəlxalq maliyyə və investisiya sahəsindəki fəaliyyətinin genişləndirilməsi, həmçinin dünyanın aparıcı investorları ilə əlaqələrin gücləndirilməsi baxımından uğurlu olub.
