Azərbaycan Respublikası Dövlət Neft Fondu (ARDNF) nümayəndə heyəti İcraçı direktor İsrafil Məmmədovun rəhbərliyi ilə Birləşmiş Ərəb Əmirliklərinin Əbu-Dabi şəhərində keçirilən Suveren Fondların Beynəlxalq Forumunun (SFBF) illik iclasında iştirak edir.
“Transformasiya dövründə dayanıqlılığın formalaşdırılması” mövzusuna həsr olunmuş forum dünyanın aparıcı suveren sərvət fondlarını bir araya gətirən yeganə beynəlxalq platformadır. Tədbir BƏƏ-nin vəliəhdi Şeyx Xalid bin Məhəmməd bin Zayid Əl-Nəhyanın himayəsi altında, Əbu-Dabi İnvestisiya Təşkilatı (ADIA), Mubadala İnvestisiya Şirkəti və digər strateji tərəfdaşların ev sahibliyi ilə baş tutur.
Forum çərçivəsində qlobal iqtisadi və geosiyasi dəyişikliklər şəraitində suveren fondların uzunmüddətli dəyər yaradan investisiya strategiyaları, dayanıqlı kapital qoyuluşu, texnoloji transformasiya və alternativ aktivlərin inkişafı kimi mövzular müzakirə olunur. Tədbirdə həmçinin Santyaqo Prinsiplərinin tətbiqinə dair beynəlxalq standartların təkmilləşdirilməsi, habelə suveren fondların şəffaflıq, hesabatlılıq və məsuliyyətli idarəetmə prinsiplərinə sadiqliyinin gücləndirilməsi məsələləri diqqət mərkəzindədir.
İllik iclas çərçivəsində keçirilən İcraçı Direktorların Forumunda çıxış edən ARDNF-nin İcraçı direktoru İsrafil Məmmədov suveren sərvət fondlarının uzunmüddətli dayanıqlılığı və inkişaf imkanlarının formalaşdırılmasında rolu, bu fondların qlobal iqtisadi sistemə təsiri, eləcə də rəqəmsallaşmanın investisiya idarəçiliyində tətbiqi perspektivləri ilə bağlı fikirlərini bölüşüb. O, müasir texnoloji innovasiyaların aktivlərin qorunması və artırılması, həmçinin kapital bazarlarında şəffaflığın təmin olunması baxımından strateji əhəmiyyətini vurğulayıb.
ARDNF-nin bu forumda iştirakı Azərbaycanın beynəlxalq maliyyə icmasında etibarlı və məsuliyyətli institusional investor kimi mövqeyini daha da möhkəmləndirir, həmçinin qlobal suveren fondlar arasında dayanıqlı inkişaf və uzunmüddətli kapital qoyuluşu sahəsində dialoqa fəal töhfəsini nümayiş etdirir.
Nəzərçarpdır ki, SFBF-nin 14-cü illik iclası 2022-ci ildə ARDNF-nin həmtəşkilatçılığı ilə Bakıda keçirilmişdi. Bu tədbir Azərbaycanın suveren fondların qlobal icmasındakı rolunu əhəmiyyətli dərəcədə gücləndirmişdi. 2024-cü ildə Oman Sultanlığının Maskat şəhərində keçirilən illik iclasda isə İsrafil Məmmədov forumun İdarə Heyəti sədrinin müavini seçilib.
