Azərbaycan Mərkəzi Bankında (AMB) keçirilən brifinqdə qurumun Statistika departamentinin direktoru Samir Nəsirov 2025-ci ilin ilk 9 ayına aid tədiyyə balansı statistikasını açıqlayıb.
Məlumata görə, dövr ərzində tədiyyə balansı qlobal əmtəə, xidmət və maliyyə bazarlarındakı əsas qiymət dəyişikliklərindən təsirlənib.
Tədiyyə balansının əsas komponenti olan cari əməliyyatlar balansında 3 milyard dollarlıq profisit formalaşıb. Bu profisit Ümumi Daxili Məhsulun (ÜDM) 5.4%-ni təşkil edir və makroiqtisadi sabitlik baxımından müsbət göstərici hesab olunur.
Eyni zamanda, tədiyyə balansının digər əsas komponenti olan kapital və maliyyənin hərəkəti balansında əsasən xalis maliyyə aktivlərinin 4.5 milyard dollar artması və xalis maliyyə öhdəliklərinin 400 milyon dollar artması səbəbindən 4.1 milyard dollarlıq kəsir yaranıb.
Bu ilin yanvar-sentyabr aylarında Azərbaycanın nəqliyyat xidmətləri balansı təxminən 1,3 milyard ABŞ dolları profisit nümayiş etdirib.
Onun sözlərinə görə, bu, ötən ilin eyni dövrü ilə müqayisədə 50 % çoxdur: “Burada əsas pay neft və qaz tranziti gəlirləri nəzərdə tutulur. Həmçinin sərnişindaşıma və yük daşıma xidmətləri də öz mövqeyini qoruyur”.
Hesabat dövründə qarşılıqlı xidmətlər dövriyyəsinin 28,2 %-i nəqliyyat xidmətləri üzrə aparılan əməliyyatların payına düşüb. Ümumi dəyəri 4 milyard ABŞ dolları olan nəqliyyat xidmətlərinin 66,3 %-i tədiyyə balansı hesabatı qeyri-rezidentlərin Azərbaycanın nəqliyyat xidmətlərindən istifadəsi ilə əlaqədar olub.
Azərbaycan rezidentlərinin qeyri-rezidentlərə göstərdikləri nəqliyyat xidmətlərinin dəyəri 2,6 milyard ABŞ dolları, qeyri-rezidentlərin Azərbaycan rezidentlərinə göstərdikləri nəqliyyat xidmətlərinin dəyəri isə 1,4 milyard ABŞ dolları təşkil edib.
Son 1 ildə qeyri-neft-qaz sektoru üzrə nəqliyyat xidmətlərinin ixracı 22,9 % artıb, idxalı isə 7,4 % azalıb.
Bu göstəricilər Azərbaycan iqtisadiyyatının beynəlxalq ticarət və maliyyə axınlarındakı mövqeyini əks etdirir.