İnformasiya Kommunikasiya Texnologiyaları Agentliyi (İKTA) sabit internet xidmətlərindən istifadə edən istehlakçıların xidmət keyfiyyəti ilə bağlı təcrübəsini və məmnunluq səviyyəsini öyrənmək məqsədilə onlayn sorğu keçirir.
GDP-nin məlumatına görə,Agentlikdən bildirilib ki, iyulun 23-də başlayan sorğu sentyabrın 20-dək davam edəcək.
Sabit internet istifadəçiləri sorğu çərçivəsində xidmət aldıqları provayder, internet bağlantısının sürəti və dayanıqlılığı, xidmətin qiymət-keyfiyyət uyğunluğu, texniki nasazlıqların aradan qaldırılması, müraciətlərin cavablandırılması, texniki dəstək və provayderlə kommunikasiya ilə bağlı təcrübələrini bölüşə bilərlər.
Sorğunun əsas məqsədi istehlakçıların internet xidmətlərindən istifadə zamanı qarşılaşdıqları çətinlikləri, xidmətlə bağlı gözləntilərini və ümumi məmnunluğa təsir göstərən amilləri daha ətraflı öyrənməkdir.
İKTA istehlakçı təcrübəsini Agentliyə daxil olan müraciətlər, “E-Şikayət” sistemi vasitəsilə qeydə alınan şikayətlər, xidmət keyfiyyətinə dair texniki ölçmələr və monitorinq nəticələri əsasında davamlı şəkildə izləyir. Məmnunluq sorğusu isə mövcud məlumatları istehlakçıların birbaşa rəyləri ilə tamamlayan əlavə qiymətləndirmə vasitəsi kimi istifadə olunacaq.
Sorğunun nəticələri ayrıca göstərici kimi deyil, İKTA-nın malik olduğu digər məlumatlar və monitorinq nəticələri ilə birlikdə təhlil ediləcək. Əldə olunan məlumatlardan xidmət keyfiyyətinə təsir göstərən problemlərin müəyyənləşdirilməsi, istehlakçı gözləntilərinin öyrənilməsi və müvafiq tənzimləmə tədbirlərinin planlaşdırılması zamanı istifadə olunacaq.
Anonim formada keçirilən sorğu 6 bölmə üzrə 20-dən çox sualdan ibarətdir və onun cavablandırılması bir neçə dəqiqə çəkir. Respondentlərdən şəxsiyyətlərini birbaşa müəyyən etməyə imkan verən məlumatlar tələb olunmur.
Sorğuda onlayn iştirakla yanaşı, “Azərpoçt” MMC-nin AZ1000 Mərkəz şəbəkə filialında, AZ1002 poçt şöbəsində, AZ1138 Yasamal şəbəkə filialında və AZ5000 Sumqayıt Mərkəzi Poçt şöbəsində də iştirak üçün şərait yaradılıb.
İKTA sabit internet xidmətlərindən istifadə edən vətəndaşları sorğuda iştirak etməyə və xidmətlə bağlı real təcrübələrini bölüşməyə çağırır.
Sorğuda iştirak etmək üçün aşağıdakı keçiddən istifadə etmək mümkündür:
https://forms.gle/hrquwN8vVYbjaU739
Sorğuya, həmçinin təqdim olunan QR kodu skan etməklə keçid etmək olar.
Agentlik hesab edir ki, istehlakçıların təqdim etdiyi rəylər internet xidmətlərinin keyfiyyətinin daha dolğun qiymətləndirilməsinə və bazarda diqqət tələb edən məsələlərin müəyyənləşdirilməsinə töhfə verəcək.