Azərbaycan Mərkəzi Bankında (AMB) “Bazar davranışlarının tənzimlənməsi departamenti”nin adı dəyişdirilib.
GDP xəbər verir ki, departament bundan sonra “Bazar davranışlarına nəzarət və tənzimləmə departamenti” adlanacaq.
Bu, AMB İdarə Heyətinin 23 iyun 2026-cı il tarixli 27/2 nömrəli qərarı ilə təsdiqlənmiş yeni Əsasnamədə əksini tapıb.
Yeni Əsasnaməyə əsasən, departamentin fəaliyyətində bazar davranışlarının tənzimlənməsi ilə yanaşı, bank və sığorta sektorunda birbaşa nəzarət funksiyası da ayrıca önə çıxarılıb.
Departament bankların və sığortaçıların bazar davranışlarına nəzarət edəcək, onların risk profillərini müəyyənləşdirəcək, növbəti və növbədənkənar yoxlamalar, monitorinqlər və test məqsədli alışlar həyata keçirəcək.
Bundan başqa, bank və sığorta şirkətləri ilə bağlı şikayətlər, hesabatlar, sosial şəbəkələr, kütləvi informasiya vasitələri və digər məlumat mənbələri təhlil ediləcək. Bu məlumatlar əsasında istehlakçıların hüquqlarının müdafiəsi ilə bağlı erkən xəbərdarlıq siqnalları müəyyənləşdiriləcək.
Departamentin strukturuna Bazar davranışlarına nəzarət şöbəsi və Bazar davranışlarının tənzimlənməsi və nəzarətin metodologiyası şöbəsi daxildir.
Yeni Əsasnamə 10 sentyabr 2026-cı ildən qüvvəyə minib.
Bununla da AMB İdarə Heyətinin 7 mart 2024-cü il tarixli 11/5 nömrəli qərarı ilə təsdiqlənmiş “Azərbaycan Respublikası Mərkəzi Bankının Bazar davranışlarının tənzimlənməsi departamenti haqqında Əsasnamə” ləğv edilib.
Sənədi Mərkəzi Bankın sədri Taleh Kazımov imzalayıb.