Azərbaycan Respublikası Mərkəzi Bankının İdarə Heyəti uçot dərəcəsinin 6,5% səviyyəsində saxlanılması barədə qərar qəbul edib.
GDP xəbər verir ki, qərara əsasən, faiz dəhlizinin yuxarı həddi də dəyişdirilməyərək 7,5% səviyyəsində saxlanılıb. Faiz dəhlizinin aşağı həddi isə 0,5 faiz bəndi azaldılaraq 5%-ə endirilib.
Mərkəzi Bank bildirir ki, faiz dəhlizinin parametrləri ilə bağlı qərar qəbul edilərkən faktiki və proqnozlaşdırılan inflyasiyanın dinamikası, valyuta bazarında gedən proseslər, bank sektorunun likvidlik mövqeyindəki dəyişikliklər və qlobal monetar şəraitdə müşahidə olunan son meyillər nəzərə alınıb.
Faiz dəhlizinin aşağı həddinin endirilməsi bank sektorunda izafi likvidliyin mövcud olduğu şəraitdə banklararası pul bazarında ticarətin təşviqinə yönəlib. Gözləntilərə görə, faiz dəhlizinin genişləndirilməsi Mərkəzi Bankın pul bazarında iştirak səviyyəsini azaltmaqla bankları öz aralarında daha aktiv əməliyyatlar aparmağa təşviq edəcək.
Uçot dərəcəsinin və faiz dəhlizinin yuxarı həddinin dəyişdirilmədən saxlanılması isə inflyasiya gözləntilərinin sabitləşdirilməsinə xidmət edir.