2026-cı il oktyabrın 1-nə Azərbaycanda pensiyaçıların sayı ötən ilin müvafiq dövrü ilə müqayisədə 5,8 min nəfər azalaraq 1 milyon 94,2 min nəfər təşkil edib.
GDP xəbər verir ki, bu barədə Dövlət Statistika Komitəsinin ölkədə sosial təminatla bağlı açıqladığı məlumatda bildirilir.
Hesabat tarixinə pensiyaçıların sayı ölkə əhalisinin 10,6 faizinə bərabər olub.
Bununla yanaşı, təyin olunmuş aylıq pensiyaların orta məbləği illik müqayisədə 10,3 faiz artaraq 595,8 manata çatıb. Bu göstərici ölkə üzrə orta aylıq əməkhaqqının 50,8 faizini təşkil edib.
Pensiya növləri üzrə ən yüksək orta aylıq məbləğ yaşa görə pensiyalarda qeydə alınıb. Belə ki, yaşa görə pensiyaların orta aylıq məbləği 10,1 faiz artaraq 633,5 manat olub.
Əlilliyə görə pensiyaların orta aylıq məbləği 10 faiz artaraq 480,4 manata, ailə başçısını itirməyə görə pensiyaların orta aylıq məbləği isə 9,7 faiz artaraq 600,5 manata yüksəlib.
Pensiyaçıların 65,5 faizi yaşa görə, 21,9 faizi əlilliyə görə, 12,6 faizi isə ailə başçısını itirməyə görə pensiya alan şəxslərdən ibarət olub.

