Azərbaycan və Dünya Bankı arasında iqtisadi əməkdaşlığın genişləndirilməsi, dövlət maliyyəsinin idarə olunması və yeni investisiya layihələrinin həyata keçirilməsi imkanları müzakirə edilib.
GDP xəbər verir ki, noyabrın 12-də maliyyə naziri Sahil Babayev Dünya Bankının Cənubi Qafqaz üzrə regional direktoru Roland Prays və Avropa və Mərkəzi Asiya regionunda rifah məsələləri üzrə regional praktika direktoru Abebe Aduqnanın daxil olduğu nümayəndə heyəti ilə görüşüb.
Görüşdə makroiqtisadi sabitliyin qorunması, fiskal dayanıqlığın gücləndirilməsi, iqtisadiyyatın şaxələndirilməsi və dövlət müəssisələrində aparılan islahatlar əsas müzakirə mövzuları olub.
Sahil Babayev bildirib ki, Dünya Bankı ilə 2025–2029-cu illəri əhatə edən Ölkə Tərəfdaşlıq Çərçivəsi özəl sektorun inkişafı, məhsuldarlığın artırılması və dayanıqlı iqtisadi artım üçün yeni imkanlar yaradır.
Nazir dövlət maliyyəsinin səmərəli idarə edilməsi, büdcə xərclərinin optimallaşdırılması və neft-qaz gəlirlərindən asılılığın mərhələli şəkildə azaldılması istiqamətində görülən tədbirlər barədə məlumat verib.
Tərəflər büdcə planlaşdırılması, xəzinədarlıq əməliyyatları və maliyyə hesabatlılığının rəqəmsallaşdırılmasını nəzərdə tutan “Rəqəmsal dövlət maliyyəsi” informasiya sisteminin yaradılması və dövlət satınalmalarının təkmilləşdirilməsi məsələlərini də nəzərdən keçiriblər.
Görüşdə 2027-ci ilin aprelində Bakıda keçirilməsi planlaşdırılan Dövlət Müəssisələri üzrə Qlobal Konfransa hazırlıq məsələləri müzakirə olunub.
Bununla yanaşı, Dünya Bankının dəstəyi ilə mühasibat uçotu və audit sahəsində hazırlanan hesabat layihəsi, maliyyə şəffaflığının artırılması və korporativ idarəetmənin gücləndirilməsi istiqamətində əməkdaşlıq imkanları qiymətləndirilib.
Xüsusilə kənd təsərrüfatı, su ehtiyatlarının idarə edilməsi, nəqliyyat və şəhər infrastrukturu sahələrində perspektiv investisiya layihələri ətrafında fikir mübadiləsi aparılıb.
Dünya Bankının nümayəndələri Azərbaycanın iqtisadi və institusional islahatlarına dəstəyin, eləcə də texniki, analitik və maliyyə əməkdaşlığının davam etdirilməsində maraqlı olduqlarını bildiriblər.
