ABŞ Mərkəzi Bankı faizləri sabit saxladı, inflyasiya proqnozu yüksəltdi

ABŞ Mərkəzi Bankı (FED) martın 18-də keçirilən iclasda əsas faiz dərəcəsini 3.5–3.75 faiz aralığında sabit saxlamaq qərarı verib. Qərar 11-ə qarşı 1 səs çoxluğu ilə qəbul olunub.
GDP xəbər verir ki, FED sədri Cerom Pauell mətbuat konfransında bildirib ki, qlobal enerji qiymətlərində artım yaxın dövrdə inflyasiyanı yüksəldə bilər. Bunun əsas səbəblərindən biri ABŞ və İsrailin İranla müharibəsinin neft bazarlarına təsiridir. Onun sözlərinə görə, iqtisadi təsirlərin nə qədər davam edəcəyini və miqyasını dəqiq qiymətləndirmək hələ mümkün deyil.
Yeni proqnozlara görə, FED rəsmiləri bu ilin sonuna qədər faiz dərəcəsinin yalnız 0.25 faiz bəndi endiriləcəyini gözləyirlər. Bununla belə, bəzi siyasətçilər əvvəlki proqnozlarla müqayisədə daha az yumşalma ehtimalını nəzərə alır.
Mərkəzi bankın hesablamalarına əsasən, inflyasiya ilin sonunda 2.7 faiz səviyyəsində olacaq. Bu göstərici dekabrda verilən 2.4 faizlik proqnozdan yüksəkdir. Artım əsasən enerji qiymətlərinin bahalaşması və tariflərlə bağlı inflyasiya təzyiqləri ilə izah olunur. FED isə uzunmüddətli hədəf kimi 2 faiz inflyasiya səviyyəsini qoruyur.
Eyni zamanda iqtisadi artım proqnozu bir qədər artırılıb. 2026-cı il üçün ABŞ iqtisadiyyatının 2.4 faiz böyüməsi gözlənilir. İşsizlik səviyyəsinin isə 4.4 faiz civarında sabit qalacağı proqnozlaşdırılır.
FED rəhbərliyi bildirib ki, pul-kredit siyasəti gələcəkdə daxil olan iqtisadi məlumatlar, dəyişən proqnozlar və risklərin balansına uyğun olaraq tənzimlənəcək. Hazırda əksər rəsmilər faiz artımını əsas ssenari kimi görmürlər, lakin belə ehtimalın müzakirə edildiyi də qeyd olunub.
Qeyd edək ki, son həftələr qlobal neft qiymətləri 1 barel üçün 80 dollardan 108 dollara qədər yüksəlib və bu da inflyasiya ilə bağlı narahatlıqları artırıb.