Azərbaycan Mərkəzi Bankının (AMB) Maliyyə sabitliyi departamentinin direktoru Ataxan Həsənov bildirib ki, ölkədə problemli kreditlərin məbləği son beş ilin orta göstəricisindən aşağıdır.
Son bir ildə qeydə alınan kiçik artıma baxmayaraq, bu artımın riskli xarakter daşımadığını vurğulayan Həsənov qeyd edib ki, əhalinin borclanması da sağlam prinsiplər əsasında həyata keçirilir və riskli deyil.
“Bizim təhlillərimiz göstərir ki, əhalinin borclanması da riskli xarakter daşımır və sağlam, AMB-nin müəyyən etdiyi prinsiplərə əsaslanır. Bir çox hallarda insanlar banklara kredit üçün müraciət edəndə, banklar hesablayıb deyir ki, sizə filan məbləğdə kredit düşür. Bu artıq AMB-nin müəyyən etdiyi qaydalar əsasında olur” – deyə Həsənov açıqlayıb.
Mərkəzi Bank rəsmisi izah edib ki, bu qaydaya “BGN qaydası” – yəni borcun gəlirə nisbəti deyilir. Bu prinsip əsasında, ay ərzində əhalinin ödədiyi borc yükü onun gəlirinin müəyyən hissəsi ilə məhdudlaşır.
Həsənov qeyd edib ki, 2019-cu ildə edilmiş dəyişikliklərlə əhalinin aylıq borc yükü onun gəlirinin 45%-dən çox olduğu halda, banklara daha yüksək ehtiyat tələbi və daha yüksək risk üzrə ölçülmüş aktiv tələbi qoyulurdu. 2022-ci ildən isə bu məhdudiyyət 70%-ə qədər artırılıb.
“Bu o deməkdir ki, əhalinin borc yükü onların gəlirlərinin 70%-dən çox ola bilməz. Düşünürük ki, bu tənzimləmələr bizi ən çox narahat edən məsələnin – izafi borclanma üzrə risklərin qarşısını alır” – deyə AMB rəsmisi əlavə edib.