“Taksonomiyaların Yol Xəritəsi Təşəbbüsü” çərçivəsində, BMT-nin İqlim Dəyişikliyi Konfransının (COP30) növbəti tədbiri zamanı dayanıqlı maliyyə taksonomiyalarının qarşılıqlı əlaqəliliyi və müqayisəliliyinin inkişafına həsr olunmuş yüksək səviyyəli tədbir keçiriləcək.
“Bakıdan Belemə: Özəl kapitalın cəlb edilməsini stimullaşdırmaq üçün taksonomiyanın qarşılıqlı əlaqəliliyinin inkişafı” adlı tədbir, Dayanıqlı Biznes üzrə COP (SB COP) və İnkişafın Maliyyələşdirilməsi üzrə Beynəlxalq Klub (IDFC) ilə əməkdaşlıqla həyata keçiriləcək.
Tədbirin əsas məqsədi, COP29-da müəyyən edilmiş və 2035-ci ilə qədər ildə ən azı 1,3 trilyon ABŞ dolları məbləğində iqlim maliyyəsi səfərbər etməyi hədəfləyən Yeni Kollektiv Kəmiyyət Hədəfinə çatmaq üçün zəruri olan özəl kapitalın hərəkətə gətirilməsini asanlaşdırmaqdır. Bu məqsədlə, müxtəlif yurisdiksiyaların dayanıqlı maliyyə taksonomiyaları arasında uyğunluğun artırılması, şəffaflığın və sərhədlərarası investisiyaların təşviqi vacib hesab olunur.
Tədbirdə hökumətlərin, inkişafı maliyyələşdirən qurumların və özəl sektorun rəhbərləri bir araya gələrək, taksonomiyaların uyğunlaşdırılması vasitəsilə özəl maliyyə axınlarının artırılması üçün praktiki həll yollarını müzakirə edəcəklər. Ortaq bir dil və standartların yaradılması, fraqmentasiyanın azaldılması və innovasiyanın təşviqi ilə kapitalın etibarlı və təsirli iqlim layihələrinə yönəldilməsi gözlənilir.
Təqdim Olunacaq Əsas Layihələr:
Tədbir çərçivəsində “Taksonomiyaların Yol Xəritəsi Təşəbbüsü” tərəfindən hazırlanmış dörd əsas layihə və alət təqdim olunacaq:
-
İcra vəziyyətinə dair hesabat: Taksonomiyaların inkişafı və əlaqəliliyindəki qlobal trendlər, irəliləyişlər və ən yaxşı təcrübələr haqqında analitik icmal.
-
Taksonomiyanın əlaqəliliyi prinsipləri: Müxtəlif yurisdiksiyalar arasında əlaqəliliyi və müqayisəliliyi təşviq etmək üçün yüksək səviyyəli təlimat prinsipları.
-
Dayanıqlı Maliyyə Taksonomiyasının xəritələnməsi sistemi: Müxtəlif taksonomiyaları müqayisə etməyə və təhlil etməyə imkan verən qlobal ictimai rəqəmsal alət.
-
Xüsusi veb-sayt: Təşəbbüs üzrə bütün məlumat və resursları əhatə edən, əməkdaşlığı asanlaşdıran rəqəmsal platforma.
Taksonomiyanın Yol Xəritəsi Təşəbbüsü haqqında:
Taksonomiyanın Yol Xəritəsi Təşəbbüsü, COP29-da Azərbaycanın təşəbbüsü ilə yaradılmış könüllü, çoxtərəfdaşlı bir platformadır. Onun əsas məqsədi dayanıqlı maliyyə taksonomiyaları arasında əlaqəliliyin və müqayisəliliyin inkişaf etdirilməsidir. Təşəbbüsün tərəfdaşları arasında Azərbaycan Respublikasının Mərkəzi Bankı, Beynəlxalq Maliyyə Korporasiyası (IFC), Birləşmiş Millətlər Təşkilatının İnkişaf Proqramı (UNDP), Avropa Birliyinin Dayanıqlı Maliyyə üzrə Məsləhət Mərkəzi və Braziliyanın Maliyyə Nazirliyi də daxil olmaqla bir sıra nüfuzlu beynəlxalq qurumlar yer alır.
Daha ətraflı məlumat üçün: www.TaxonomiesRoadmap.org