“Le Royal Meridien Abu Dhabi” oteli otelçilik sahəsində 30 ilə yaxın təcrübəyə malik Rövşən Məmmədovu Maliyyə Direktoru vəzifəsinə təyin edib.
R.Məmmədov qonaqpərvərlik, daşınmaz əmlak və sənaye sahələrində zəngin təcrübəyə malikdir. O, bu vəzifəyə qədər Azərbaycan Sənaye Korporasiyasında 19 törəmə müəssisəni əhatə edən 800 milyon ABŞ dolları dəyərində aktiv portfelini idarə edib.
Karyerası boyunca R.Məmmədov Azərbaycan, Gürcüstan və Qazaxıstanda yerləşən “Trump International Hotel Baku”, “Hyatt Regency” və “Marriott International” kimi tanınmış otel şəbəkələrinin maliyyə departamentlərində rəhbər vəzifələrdə çalışıb və beynəlxalq səviyyədə dəyərli təcrübə toplayıb.
Qeyd edək ki, Le Meridien 1972-ci ildə Air France tərəfindən Fransada yaradılıb. Lüks otellər şəbəkəsi kimi fəaliyyət göstərən marka hazırda dünyanın təxminən 40 ölkəsində öz otel və kurortları var.