Türkmənistan, Azərbaycan, Qazaxıstan və Özbəkistan Xəzər regionunda əsas qaz hasil edən ölkələr kimi köhnəlmiş qaz infrastrukturunu saxlamaqla yanaşı, artan tələbatı ödəmək üçün böyük subsidiyalara ehtiyac duyurlar. Bu ölkələr ümumi problemlərlə üzləşirlər, o cümlədən qaz infrastrukturunun modernləşdirilməsi və bərpa olunan enerji mənbələrinin genişləndirilməsinə ehtiyac var.
GDP xəbər verir ki, bu barədə Beynəlxalq Enerji Agentliyi (BEA) 2024-cü il üçün Qlobal Enerji Hesabatında (“World Energy Outlook 2024”) bildirilir.
Dünya təbii qazının 15%-dən çoxu Rusiya və Xəzər regionundan keçən boru kəmərləri vasitəsilə nəql olunur. Lakin bu infrastrukturun böyük bir hissəsi sovet dövründə tikilib və müasir investisiyaların azlığı səbəbindən köhnəlmişdir. Nəticədə, Xəzəryanı ölkələr, o cümlədən Azərbaycan, tez-tez enerji kəsilmələri və metan tullantılarından əziyyət çəkir. Xəzər regionunda hər il təxminən 10 Mt metan uçucu qaz şəklində itirilir və əlavə olaraq 2 Mt məşəldə yandırılır. Bu təbii qazın ixracı 2023-cü ildə 8 milyard ABŞ dollarına qədər gəlir gətirə bilərdi.
Qaz infrastrukturlarının təkmilləşdirilməsi hər kilometr üçün 500 000 – 3 milyon ABŞ dollarına başa gəlir. 2030-cu ilə qədər metan emissiyalarının azaldılması üçün investisiya dəyəri isə təxminən 700 milyon ABŞ dollarıdır. Qaz ixracının dayanıqlığı və yerli tələbin artması ilə bağlı məsələlər əsas problemlərdən biridir. Xəzər regionunun qaz ixracının bugünkü 70 milyard kubmetrdən 2035-ci ilə qədər 95 milyard kubmetrə yüksəlməsi proqnozlaşdırılır, baxmayaraq ki, bəzi ixrac bazarları qazdan uzaqlaşmağa başlayır, bu isə təxminən 55 milyard kubmetrə qədər azalmaya səbəb ola bilər.