Azərbaycan Mərkəzi Bankının (AMB) yarımillik “Pul Siyasəti İcmalı”na əsasən, banklararası təminatsız pul bazarında formalaşan AZIR istinad faiz dərəcəsi 2026-cı ilin birinci yarısında uçot faiz dərəcəsinə yaxın səviyyədə hərəkətini davam etdirib.
GDP xəbər verir ki,“Pul Siyasəti İcmalı”nda bildirilir ki, AZIR indeksinin uçot faiz dərəcəsindən orta kənarlaşması 2025-ci ildə 0,21 faiz bəndi olduğu halda, 2026-cı ilin ilk yarısında bu göstərici 0,05 faiz bəndinədək azalıb.
Beləliklə, AZIR indeksi ilə uçot faiz dərəcəsi arasındakı orta fərq ötən illə müqayisədə 0,16 faiz bəndi daralıb.
AMB-nin qiymətləndirməsinə görə, spredin daralması Mərkəzi Bankın uçot faiz dərəcəsinin banklararası pul bazarında formalaşan faiz dərəcələrinə ötürülməsinin, yəni pul siyasətinin faiz kanalı üzrə transmissiyasının gücləndiyini göstərir.
Bu dinamika Mərkəzi Bankın faiz qərarlarının banklararası bazardakı qısamüddətli faizlərə daha effektiv təsir etdiyini və pul bazarında faizlərin uçot dərəcəsi ətrafında daha sıx formalaşdığını göstərən amil kimi qiymətləndirilə bilər.