Azərbaycan Biznesinin İnkişafı Fondunun (ABDF) təqdim etdiyi maliyyə alətləri müxtəlif risk səviyyələrinə, biznes ölçülərinə və layihələrin inkişaf mərhələlərinə uyğun şəkildə formalaşdırılıb.
GDP xəbər verir ki,bu yanaşma həm iri investisiya layihələrinin, həm də kiçik və orta biznes subyektlərinin maliyyə resurslarına çıxış imkanlarını genişləndirir.
ABDF-nin investisiya mexanizmi əsasən iri layihələrə yönəlib. Mexanizm çərçivəsində layihə şirkətinin nizamnamə kapitalına minimum investisiya qoyuluşu 500 min manat təşkil edir. Fond layihədə 30 faizədək payla iştirak etməklə risklərin bölüşdürülməsini təmin edir, sahibkar isə idarəetmə imkanlarını qoruyur.
Layihələr üzrə minimum 10 faiz daxili gəlirlilik norması tələbinin müəyyənləşdirilməsi iqtisadi cəhətdən əsaslandırılmış və inkişaf potensialına malik layihələrin seçilməsinə xidmət edir. Fondun layihələrdə iştirak müddəti 5–7 il təşkil edir. Bu müddət başa çatdıqdan sonra Fondun layihədən çıxması və resurslarını yeni layihələrə yönəltməsi nəzərdə tutulur.
Güzəştli kredit mexanizmi iqtisadiyyatın prioritet sahələri üzrə fəaliyyət göstərən sahibkarları əhatə edir və onun təsiri təqdim olunan əlverişli şərtlər vasitəsilə formalaşır. Kreditlərin 5 000 manatdan 10 000 000 manatadək məbləğdə və 10 ilədək müddətə verilməsi sahibkarlara müxtəlif miqyaslı layihələri həyata keçirmək imkanı yaradır.
Kredit müddətinin yarısınadək güzəşt müddətinin tətbiq edilməsi sahibkarlara biznes gəlir formalaşdırmağa başlamazdan əvvəl əsas borc ödənişlərini təxirə salmaq imkanı verir. Bu isə layihələrin ilkin mərhələdə maliyyə çətinliyi ilə üzləşməsi və iflas riskini azaldır.
ABDF-nin dövlət zəmanəti və faiz subsidiyası mexanizmi sahibkarların müvəkkil kredit təşkilatlarından cəlb etdikləri 5 milyon manatadək biznes kreditlərini əhatə edir. Müvəkkil kredit təşkilatlarına banklar, bank olmayan kredit təşkilatları, eləcə də lizinq, faktorinq və investisiya fəaliyyəti ilə məşğul olan kommersiya hüquqi şəxsləri daxildir.
2024-cü ildən tətbiq edilən mexanizm hazırda işğaldan azad edilmiş ərazilərdə həyata keçirilən layihələrə şamil olunur. Azərbaycan Prezidentinin 9 iyun 2026-cı il tarixli Fərmanına əsasən, mexanizmin gələcəkdə Bakı şəhəri və Abşeron rayonu istisna olmaqla, digər regionlarda da tətbiqi nəzərdə tutulur.
İşğaldan azad edilmiş ərazilərdə həyata keçirilən layihələr üzrə kreditlərin 90 faizədək, digər regionlarda isə 50 faizədək hissəsi dövlət zəmanəti ilə təmin ediləcək. Bu yanaşma müvəkkil kredit təşkilatlarının risklərini və girov təminatı ilə bağlı tələblərini azaltmaqla perspektivli biznes layihələrinin maliyyələşdirilməsinə marağı artıracaq.
Mexanizm çərçivəsində kreditlər üzrə illik faiz dərəcəsinin maksimum həddi 13 faiz müəyyən edilir. Faiz yükünün yarısı 36 ayadək müddətdə dövlət tərəfindən subsidiyalaşdırılır. Kredit müddətinin 7 ilədək, güzəşt müddətinin isə 36 ayadək müəyyənləşdirilməsi ödəniş qrafikinin biznesin real maliyyə axınına uyğun qurulmasına imkan verir.
ABDF tərəfindən təqdim olunan investisiya, güzəştli kredit, dövlət zəmanəti və faiz subsidiyası alətləri bir-birini tamamlayan kompleks maliyyələşdirmə mexanizmləri kimi çıxış edir. Bu alətlər sahibkarların maliyyə resurslarına çıxışını genişləndirməklə yanaşı, investisiya risklərinin azalmasına, regionlarda iqtisadi fəallığın yüksəlməsinə və bizneslərin dayanıqlı inkişafına şərait yaradır.