Bank Respublika və AccessBank-ın birləşməsi nəticəsində aktivləri 4,5 milyard manat olan maliyyə institutu formalaşacaq.
GDP xəbər verir ki, birləşmiş bankın kredit portfelinin həcmi 3,3 milyard manata çatacaq.
Bank Respublika və AccessBank-ın səhmdarları Bank Respublika tərəfindən AccessBank-ın səhmlərinin 100 faizinin alınmasını nəzərdə tutan strateji əqdin əsas şərtlərini təsdiqləyiblər.
Əqdin 2026-cı ilin noyabr ayınadək tamamlanması planlaşdırılır.
Məlumata görə, səhmlərin alınması başa çatdıqdan sonra Bank Respublika və AccessBank ilkin mərhələdə ayrı-ayrı banklar kimi fəaliyyətlərini davam etdirəcəklər. Növbəti mərhələdə isə tənzimləyici tələblərə uyğun olaraq bankların vahid maliyyə institutunda birləşdirilməsi nəzərdə tutulur.
Bildirilir ki, hər iki bank oxşar korporativ mədəniyyətə və biznes modelinə malikdir. Banklar ölkənin müxtəlif bölgələrində mikro, kiçik və orta sahibkarların maliyyələşdirilməsinə xüsusi diqqət ayırırlar.
Birləşmənin daha geniş fəaliyyət miqyasına, güclü maliyyə imkanlarına və möhkəm bazar mövqeyinə malik bankın yaradılmasına imkan verəcəyi qeyd olunur. Yeni bankın müştərilərinə daha geniş məhsul və xidmətlər təqdim edəcəyi gözlənilir.
Bank Respublika-nın Müşahidə Şurasının sədri Şakir Rəhimov bildirib ki, razılaşma bankın inkişafında yeni mərhələnin başlanğıcıdır.
Onun sözlərinə görə, aparıcı beynəlxalq maliyyə institutlarının Bank Respublika-nın səhmdarları sırasına qoşulması həmin qurumlarla uzunmüddətli münasibətləri yeni tərəfdaşlıq səviyyəsinə yüksəldəcək.
AccessBank-ın Müşahidə Şurasının sədri Oleq İvaniyçuk isə bildirib ki, iki bankın birləşməsi gələcək artım, fəaliyyət miqyasının genişləndirilməsi və Azərbaycan iqtisadiyyatına daha böyük töhfə verilməsi üçün möhkəm zəmin yaradacaq.
Satınalma və birləşmə prosesinin gedişi barədə müştərilərə, tərəfdaşlara və ictimaiyyətə mütəmadi məlumat veriləcəyi bildirilib.