Azərbaycan Mərkəzi Bankı bank sektorunda yeni texnologiyalar əsasında tənzimləmələr tətbiq edir
GDP xəbər verir ki, Azərbaycan Mərkəzi Bankı (AMB) bank sektorunun təhlükəsiz və sabit fəaliyyətini təmin etmək məqsədilə müasir trendləri nəzərə alaraq bir sıra yenilikçi təşəbbüslər həyata keçirir. Bu təşəbbüslər sırasında borcalanların davranış modelləri əsasında kreditləşmə üçün yeni prudensial tənzimləmə çərçivəsinin formalaşdırılması xüsusi əhəmiyyət kəsb edir.
Mərkəzi Bankın qəbul etdiyi dəyişikliklərə əsasən, davranış modelləri borcalanların maliyyə əməliyyatlarını analiz edərək onların proqnozlaşdırılan gəlirlərinə uyğun kredit verilməsini təmin edir. Banklar bu modellər əsasında kredit portfelinin yalnız 10%-nə qədər həcmində kredit verə biləcək. Bununla belə, 90 gündən artıq gecikdirilmiş kreditlərin payı həmin portfelin 10%-ni aşdığı halda, davranış modelləri ilə kredit verilişi dayandırılacaq.
Yeni tənzimləmələrə uyğun olaraq, davranış modelinin hazırlanması, validasiyası və hesabatlığı üçün xüsusi tələblər müəyyən edilib. Eyni zamanda, kredit risklərinin azaldılması məqsədilə daha sərt təsnifləşdirmə və artırılmış kapital tələbləri tətbiq olunacaq.
Bank sektoru və müştərilər üçün yeni imkanlar
Yeni davranış modelləri bank xidmətlərinin müştəri yönümlü şəkildə optimallaşdırılmasına şərait yaradacaq. Xüsusilə kiçik və orta sahibkarların maliyyə resurslarına çıxışı genişlənəcək, məşğulluq imkanları artacaq və iqtisadi resursların daha məhsuldar bölüşdürülməsi mümkün olacaq.
Eyni zamanda, müasir texnologiyaların tətbiqi banklara əməliyyat xərclərini azaltmağa, kredit anderraytinqi və skorinq proseslərini sürətləndirməyə və kredit risklərini effektiv şəkildə idarə etməyə kömək edəcək. Süni intellekt həlləri və proqnozlaşdırılan məlumatlardan istifadə bankların biznes proseslərinin daha dəqiq və şəffaf idarə olunmasını təmin edəcəkdir.
Azərbaycan Mərkəzi Bankının bu təşəbbüsləri bank sektoru ilə yanaşı, ölkənin ümumi iqtisadi inkişafına da müsbət təsir edəcəkdir.