Azərbaycanda bank sektorunun cəlb etdiyi vəsaitlərin kreditləşməyə yönəldilən hissəsi son üç ildə əhəmiyyətli dərəcədə artıb.
GDP xəbər verir ki, bunu PAŞA Bankın İdarə Heyəti sədrinin müşaviri Bəhruz Nağıyev bankın 2026-cı ilin birinci yarısının maliyyə nəticələrinin açıqlanmasına həsr olunmuş mətbuat konfransında deyib.
Bəhruz Nağıyevin sözlərinə görə, təxminən üç il əvvəl cəlb olunan vəsaitlərin yalnız 60 faizi kreditləşməyə yönəldilirdisə, hazırda bu göstərici 70 faizə çatıb.
“Düşünürəm ki, bu rəqəm daha da artmalıdır. Biz daha fəal olmalı və iqtisadiyyata daha çox maliyyələşmə təqdim etməyə çalışmalıyıq”, – o bildirib.
Bank rəsmisi vurğulayıb ki, proses yalnız maliyyə sektorunun fəaliyyətindən asılı deyil. İqtisadiyyatda islahatların davam etdirilməsi maliyyələşmənin genişlənməsi üçün də vacibdir.
Onun sözlərinə görə, hüquqi şəxslərə və sahibkarlara verilən kreditlərdə artımın müşahidə olunması iqtisadi aktivlik baxımından əhəmiyyətli göstəricidir.
“Əgər iqtisadi sağalmadan danışırıqsa, bu rəqəmlərə diqqət etməliyik. Bunlar maliyyələşmənin getdiyini göstərən əsas indikatorlardır”, – Bəhruz Nağıyev bildirib.