Bu həftə ABŞ Ticarət Palatasının (AmCham) tarixdə ilk dəfə təşkil etdiyi Avrasiya İqtisadi Sammitində paneldə ABŞ-ın Türkiyədəki səfirliyinin nazir müşaviri Maykl L.-nin moderatorluğu ilə, Dünya Bankının baş iqtisadçısı Dr. Claire Hollweg və Boeing-in Avrasiya üzrə kommersiya satış direktoru Mario Antonio Ebcimin iştirakı ilə, Transxəzər və ya Orta Dəhlizdə iqtisadi inteqrasiya və regional əməkdaşlığın artırılması ehtiyacları müzakirə olunub.
GDP xəbər verir ki,sözügedən paneldə “NEQSOL Holding” Azərbaycan ofisinin rəhbəri İmran Əhmədzadə iştirak edib.
İmran Əhmədzadə çıxışında vurğulayıb ki, Orta Dəhliz özəl sektor üçün istifadə olunmamış böyük potensiala malikdir, lakin infrastrukturun inkişafı ilə bağlı problemlərin həlli üçün beynəlxalq maliyyə institutlarının dəstəyi ilə hökumət dəstəyi də tələb olunur.
Əhmədzadə həmçinin investorların güvənini təmin etmək üçün sabit və şəffaf tənzimləmə mühitinin vacibliyinə toxunub. O, hökumətlərin və tənzimləyici orqanların bürokratiyanın sadələşdirilməsinə, gömrük prosedurlarında şəffaflığın artırılmasına və investisiyalar üçün uzunmüddətli stimullar yaratmasına diqqət göstərməli olduqlarını qeyd edib.
İmran Əhmədzadə “NEQSOL Holding”in regiondakı əhəmiyyətli infrastruktur layihələrinə də toxunub və Rəqəmsal İpək Yolu layihəsini xüsusi vurğulayıb. Bu layihə çərçivəsində Xəzər dənizinin dibi ilə çəkilən fiber optik kabel Asiya və Avropa arasında ən qısa, ən sürətli və yüksək ötürmə qabiliyyətinə malik internet bağlantısını təmin etməyi hədəfləyir. Əhmədzadə bildirib ki, bu layihə regional əməkdaşlığın artırılmasına və kommunikasiya tələblərinin ödənilməsinə mühüm töhfə verəcək.
“Katz və Kallorda tərəfindən aparılan araşdırmalara əsasən, rəqəmsal inkişaf indeksindəki 1%-lik artım adambaşına ÜDM-də 0,13%-lik artımla nəticələnir,” – deyən Əhmədzadə, Mərkəzi Asiya ölkələrində internetə nüfuzetmə nisbətinin aşağı olduğunu vurğulayıb və “Rəqəmsal İpək Yolu” layihəsinin bu göstəricinin yaxşılaşmasına töhfə verəcəyinə ümid etdiklərini bildirib.
