Azərbaycanda avtonəqliyyat vasitələrinin könüllü sığortası — Kasko üzrə yeni yanaşmaların tətbiqi nəzərdə tutulur.
GDP xəbər verir ki. bunu Azərbaycan Mərkəzi Bankının sədrinin birinci müavini Əliyar Məmmədyarov Bakıda keçirilən XI Azərbaycan Beynəlxalq Sığorta Forumunda bildirib.
Onun sözlərinə görə, nəzərdə tutulan dəyişikliklər Kasko sığortası sahəsində beynəlxalq sığorta prinsiplərinə uyğunlaşmanı təmin edəcək, tərəflərin hüquq və öhdəliklərinin daha aydın müəyyənləşdirilməsinə, eləcə də istehlakçı məmnuniyyətinin artırılmasına şərait yaradacaq.
Ə.Məmmədyarov qeyd edib ki, daşınmaz əmlakın icbari sığortası üzrə də təkmilləşdirmələr aparılır. Bu dəyişikliklər katastrofik risklərin təsirinin azaldılmasına, sığorta təminatının daha adekvat formalaşdırılmasına və zərərlərin daha operativ qiymətləndirilməsinə imkan verəcək.
AMB rəsmisi əlavə edib ki, aqro-sığorta sistemi üzrə yeni qanunvericilik təşəbbüsləri hazırlanıb. Onun sözlərinə görə, bu təşəbbüslər sistemin institusional əsaslarının gücləndirilməsinə, risklərin daha dayanıqlı idarə olunmasına və dövlət dəstəyinin effektivliyinin artırılmasına xidmət edəcək.
Sığorta vasitəçiliyi institutunun inkişafı istiqamətində də dəyişikliklər hazırlanır. Bu dəyişikliklərin vasitəçilərin peşəkarlığının artırılmasına, sığorta əhatəsinin genişləndirilməsinə və bazarın inkişafına töhfə verəcəyi gözlənilir.
Ə.Məmmədyarov, həmçinin işsizlikdən sığorta təminatı verən kredit sığortası məhsulunun hazırlandığını bildirib. Onun sözlərinə görə, bu məhsul kredit alan şəxslərin maliyyə təhlükəsizliyinin gücləndirilməsinə xidmət edəcək.
“Ümumilikdə sığorta bazarında aparılan təkmilləşmələr sektorun dayanıqlığının artırılmasına yönəlib”, — deyə AMB rəsmisi vurğulayıb.