Türk dünyası ölkələrinin öz aralarındakı ticarətinin ümumi xarici ticarətdə payının qısa müddətdə 10 faizdən yuxarı qaldırılması hədəflənməlidir.
GDP xəbər verir ki, bunu AK Parti sədrinin müavini, Türk Dövlətləri ilə Əlaqələr üzrə rəhbər, Ankara millət vəkili Kürşad Zorlu bildirib.
Onun sözlərinə görə, hazırda Türk dünyası ölkələrinin qarşılıqlı ticarətinin onların ümumi ticarətindəki payı təxminən 7 faiz təşkil edir.
“Bir neçə il əvvəl bu göstərici təxminən 3 faiz idi. Onun yüksəlməsi, əlbəttə, əhəmiyyətlidir. Ancaq mövcud iqtisadi potensialımızı nəzərə aldıqda qısa müddətdə bu göstəricini 10 faizdən yuxarı qaldırmaq həm məsuliyyətimiz, həm də qarşımızdakı fürsətdir”, – K.Zorlu deyib.
O vurğulayıb ki, yeni mərhələdə Türk dövlətləri yalnız bir-birinə məhsul satmağa deyil, birgə istehsal, logistika, texnologiya və üçüncü bazarlara ortaq çıxış imkanlarına fokuslanmalıdır.
“Artıq birlikdə istehsal etməyin, birlikdə daşımağın, birlikdə texnologiya inkişaf etdirməyin və dünyaya birlikdə açılmağın vaxtıdır”, – deyə o əlavə edib.