Noyabr ayının 14-də Azərbaycan Respublikasının Mərkəzi Bankı COP29 çərçivəsində Maliyyə, İnvestisiya və Ticarət Günündə “Qlobal maliyyə sistemi: iqlim fəaliyyəti üçün maliyyələşmənin genişləndirilməsi” mövzusunda mühüm tədbir təşkil edib.
GDP xəbər verir ki, tədbir Paris Sazişi məqsədləri ilə uyğunluq çərçivəsində yaşıl keçid üçün iqlim maliyyələşməsinin genişləndirilməsi və resursların səfərbər edilməsi məsələlərini müzakirə məqsədilə Çoxtərəfli İnkişaf Bankları (MDB-lər), investorlar da daxil olmaqla dövlət və özəl sektorların liderlərini bir araya gətirib.
Mərkəzi Bankın sədri Taleh Kazımov açılış nitqində iqlim maliyyələşməsindən danışarkən kollektiv fəaliyyətin zəruriliyini vurğulayıb:”Hamımız başa düşürük ki, iqlim dəyişikliyi təkcə ekoloji böhran deyil. Bu, bütün ölkələrdən dərhal və birgə fəaliyyət tələb edən mürəkkəb bir böhrandır”
Sədr çıxışı zamanı milli səviyyədə həyata keçirilən təşəbbüsləri və Mərkəzi Bankın dayanıqlı keçidin dəstəklənməsində rolunu qeyd edib.
Tədbir iki mühüm panel müzakirəsi ilə müşayiət olunub:
“İqlim maliyyəsi: iqlim ambisiyasının ölçüləbilən fəaliyyətə çevrilməsi” – Toronto Mərkəzinin prezidenti və baş icraçı direktoru Babək Abbaszadənin moderatorluğu ilə baş tutan müzakirə panelində Beynəlxalq Valyuta Fondunun icraçı direktor müavini Bo Li, Dünya Bankının Dayanıqlı İnkişaf üzrə vitse-prezidenti Yurgen Vogele, Asiya İnkişaf Bankının vitse-prezidenti (Cənubi, Mərkəzi və Qərbi Asiya) Yinqminq Yanq və Avropa Yenidənqurma və İnkişaf Bankının Siyasət və Tərəfdaşlıq üzrə vitse-prezidenti Mark Bouman MDB-lərin uyğunluğu, siyasət islahatları və innovasiyalara diqqət yetirməklə inkişaf etməkdə olan bazarlarda iqlim maliyyələşməsinin genişləndirilməsi strategiyaları ilə bağlı fikirlərini bölüşüb.
“Qlobal maliyyə qarşılıqlı fəaliyyət vasitəsilə iqlim maliyyəsinin genişləndirilməsi” – bu sessiyada “Euronews”un Yaxın Şərq üzrə Büro rəhbəri Ceyn Vizerspun, Avropa İnvestisiya Bankının vitse-prezidenti Ambroz Fayol, “J.P.Morgan” şirkətinin dayanıqlı investisiya üzrə baş strateqi Cenifer Vu, “Commerzbank AG”nin icraçı direktoru və ESİ üzrə rəhbəri Bülent Karakaya qlobal maliyyə sahəsində qarşılıqlı fəaliyyətinin gücləndirilməsi, eləcə də MDB-lər və daha geniş maliyyə sistemi arasında təkmilləşdirilmiş koordinasiyaya diqqət yetirməklə tənzimləyici çərçivələrin və təcrübələrin daha yaxşı uyğunlaşdırılmasının əhəmiyyətindən danışıb.
Azərbaycan bank sektorunun ölkədə yaşıl keçidinin və dayanıqlı maliyyə ekosisteminin dəstəklənməsinə 2 milyard manatlıq maliyyə öhdəliyinin ayrılması ilə bağlı bəyanatı tədbirin mühüm məqamlarından olub.
Azərbaycan Mərkəzi Bankı tərəfindən təşkil olunan bu tədbir iqlim fəaliyyətində ölkənin fəal rolunu nümayiş etdirməklə dayanıqlı maliyyə sahəsində regional və qlobal təşəbbüslər üçün istinad mənbəyinə çevriləcək.