2023-cü ilin 11 ayı ilə 2024-cü ilin 11 ayı arasında manatın nominal və real effektiv məzənnələrində (NEER və REER) müəyyən dəyişikliklər müşahidə edilib.
GDP xəbər verir ki, nominal effektiv məzənnəyə (NEER) nəzər yetirsək, ümumi göstərici 2023-cü ilin noyabr ayında 102,0 olduğu halda, 2024-cü ilin noyabrında 107,5-ə yüksəlib. Bu, manatın nominal dəyərinin ümumi göstərici üzrə 5,5 bənd və ya 5,39% artımını ifadə edir. Qeyri-neft sektoru üzrə isə artım daha güclüdür: 2023-cü ildə 168,5, 2024-cü ildə isə 180,4səviyyəsinə yüksələrək 11,9 bənd və ya 7,06% artıb. Bu, qeyri-neft sektorunda manatın nominal dəyərinin daha çox gücləndiyini göstərir.
Real effektiv məzənnəyə (REER) gəldikdə, ümumi göstərici 2023-cü ilin noyabrında 121,4 olduğu halda, 2024-cü ilin eyni dövründə 122,6-ya çatıb. Bu, cəmi 1,2 bənd və ya 0,99% artımı ifadə edir. Qeyri-neft sektoru üzrə real effektiv məzənnədə isə daha kiçik bir dəyişiklik olub. Göstərici 2023-cü ildə 118,8, 2024-cü ildə isə 119,0 olub ki, bu da yalnız 0,2 bənd və ya 0,17% artım deməkdir.
Bu göstəricilərdən belə nəticəyə gəlmək olar ki, manatın nominal effektiv məzənnəsində əhəmiyyətli artım müşahidə olunur, xüsusilə qeyri-neft sektoru üzrə. Bu, manatın xarici valyutalar qarşısında nominal olaraq daha gücləndiyini göstərir. Lakin real effektiv məzənnədəki artım daha zəifdir, bu da inflasiyanın və digər iqtisadi faktorların manatın alıcılıq gücünə təsir göstərdiyini göstərir.