Qlobal ödəniş texnologiyaları lideri Mastercard ilə yerli fintex həlli m10 arasında ilk birgə layihə çərçivəsində “m10 rəqəmsal kartı” istifadəyə verilib.
GDP xəbər verir ki, bu təşəbbüs Azərbaycanda təhlükəsiz, rahat və innovativ maliyyə xidmətlərinin yayılmasına xidmət edəcək.
Əməkdaşlıq Mastercard-ın qlobal təcrübəsi ilə m10-un yerli innovasiyasını birləşdirərək ölkənin rəqəmsal iqtisadiyyata keçidini dəstəkləyir. Mastercard dəstəyi ilə hazırlanan rəqəmsal kart m10 tətbiqi daxilində dərhal aktivləşir və istifadəçilərə həm ölkə daxilində, həm də xaricdə mobil əsaslı ödəniş imkanı yaradır.
Kart m10 cüzdanı ilə eyni balansdan istifadə edir və əlavə hesab tələb etmir. İstifadəçilər onu Apple Wallet və ya Google Wallet-ə əlavə edərək, bir neçə saniyə ərzində onlayn, oflayn və beynəlxalq ödənişlər edə biləcəklər. Təsdiqlənmiş istifadəçilər kontaktsız ödənişlər, onlayn alışlar, NFC nəqliyyat ödənişləri və hətta internet olmadan da ödəniş funksiyalarından faydalana biləcək.
Təhlükəsizlik Mastercard-ın qabaqcıl antifrod və təhlükəsizlik texnologiyaları ilə təmin olunur. Layihənin məqsədi uzunmüddətli rəqəmsal adaptasiyanı, maliyyə savadlılığını və dayanıqlı iqtisadi artımı təşviq etməkdir.
m10-un Məhsul üzrə sahə rəhbəri Leyla Məmmədova qeyd edib: “Bu, sadəcə yeni bir funksiya deyil; m10-un inkişafında mühüm bir mərhələdir. Məqsədimiz istifadəçilərin müasir rəqəmsal ödəniş vərdişlərini mənimsəyərkən özlərini inamlı və səlahiyyətli hiss etmələrini təmin etməkdir.”
Bu addım Azərbaycanın nağdsız iqtisadiyyat və rəqəmsal innovasiya istiqamətindəki geniş strategiyası ilə uyğunlaşır. m10 və Mastercard əməkdaşlığı ilə milyonlarla istifadəçiyə təhlükəsiz, qlobal qəbul olunan ödəniş imkanları birbaşa mobil cihazlarına gətirilir.