“Mastercard”ın Azərbaycan üzrə ölkə meneceri Emil Zeynalov açıqlayıb ki, şirkət artıq paytaxt metrosunda tətbiq olunan açıq dövrəli ödəniş sistemi tezliklə avtobuslarda da işlədiləcək.
GDP xəbər verir ki, metrodakı modelin uğurundan sonra bu texnologiyanın nəqliyyatın digər növlərinə də genişləndirilməsi nəzərdə tutulur. Emil Zeynalov qeyd edib ki, dünyada özünü sübut etmiş bu sürətli və ağıllı sistem şəhər sakinlərinə gediş haqqını birbaşa bank kartları ilə ödəmək rahatlığı yaradır.
“Bu əlamətdar hadisə Bakını texnologiyalarımızın gündəlik səfərləri asanlaşdırdığı 300 şəhərlik qlobal şəbəkənin parçası edir,” – deyə o vurğulayıb.
Açıq dövrəli ödəniş sisteminin üstünlüyünü onun sadəliyi, sürəti və inklüzivliyində görən Mastercard nümayəndəsi qeyd edib ki, sistem əlavə kart və ya tətbiq tələb etmir, bu da onun əlçatanlığını artırır.
Emil Zeynalov bildirib ki, bu sistem şəhərlərə miqyaslanma və səmərəlilik qazandırır. Mastercardın missiyasının şəhər mobilliyində rəqəmsallaşma və dayanıqlılığı irəli aparmaq, həyatı asanlaşdıran daha sürətli və təhlükəsiz həllər yaratmaq olduğunu da əlavə edib.