Azərbaycan Mərkəzi Bankının sədr müavini Toğrul Əliyevin rəhbərlik etdiyi nümayəndə heyəti Qazaxıstan Respublikasının Maliyyə Bazarının Tənzimlənməsi və İnkişafı Agentliyində işgüzar səfərdə olub.
GDP xəbər verir ki,səfər çərçivəsində Agentliyin sədri Mədinə Abılkasımova və qurumun məsul rəhbər şəxsləri ilə Mərkəzi Bankın nümayəndə heyəti arasında görüş keçirilib. Görüşdə kredit təşkilatlarının fəaliyyətinin tənzimlənməsi və nəzarəti sahəsində aktual məsələlər müzakirə edilib, bu istiqamətdə qurumlararası əməkdaşlığın əhəmiyyəti və səmərəliliyi vurğulanıb.
Səfər zamanı iki qurumun nümayəndələri arasında bir sıra işgüzar görüşlər də baş tutub. Görüşlərdə risk əsaslı nəzarətin əsas elementlərindən olan nəzarət baxışı və qiymətləndirmə prosesi — SREP, aktivlərin keyfiyyətinin qiymətləndirilməsi, stres-testləşdirmə və model risklərinin idarə edilməsi kimi mövzular ətrafında fikir mübadiləsi aparılıb.
Həmçinin qeyd olunan nəzarət alətlərinin daha səmərəli tətbiqi məqsədilə süni intellekt və nəzarət texnologiyalarından — SupTech həllərindən istifadə imkanları müzakirə olunub.