OPEC+ ölkələrinin noyabrın 1-də keçiriləcək iclasda noyabr ayı üçün mövcud neft hasilatı kvotalarını dəyişməz saxlayacağı gözlənilir.
GDP xəbər verir ki, Reuters-in mənbələrinə görə, alyans qarşıdakı görüşdə hədəf hasilat səviyyələrinə dəyişiklik etməyi planlaşdırmır. Bu, hasilatla bağlı mövcud fasilənin davam etdirilməsi deməkdir.
Zəif tələb və təklif artıqlığı fonunda kvotaların kəskin dəyişdirilməsi bazarda qiymət dalğalanmalarını gücləndirə bilər. Mövcud yanaşma iştirakçı ölkələrin bazar payını artırmaqdan daha çox qiymət sabitliyini qorumağa üstünlük verdiyini göstərir.
Gözlənti təsdiqlənərsə, Brent neftinin qiymətinə təzyiqin məhdud qalacağı, bazarın diqqətinin isə makroiqtisadi göstəricilərə və ABŞ-də neft ehtiyatlarının dinamikasına yönələcəyi ehtimal olunur.