Cari ilin ilk altı ayında Azərbaycan iqtisadiyyatına 3,6 milyard ABŞ dolları həcmində birbaşa xarici investisiya yatırılıb.
GDP xəbər verir ki, bunu Azərbaycan Mərkəzi Bankında keçirilən brifinqdə qurumun Statistika departamentinin direktoru Samir Nəsirov deyib.
Onun sözlərinə görə, ölkə iqtisadiyyatına yatırılan birbaşa xarici investisiyaların 2,8 milyard dolları neft-qaz sektorunun, təxminən 877 milyon dolları isə qeyri-neft sektorunun payına düşüb.
Samir Nəsirov bildirib ki, günəş və külək enerjisi də daxil olmaqla bərpa olunan enerji sahəsinə yönəldilən investisiyalar bu statistikada qeyri-neft sektoruna aid edilir.
O, həmçinin Azərbaycanın xarici iqtisadiyyata yönəltdiyi birbaşa investisiyalara toxunub. Bildirilib ki, hesabat dövründə xaricə yatırılan birbaşa investisiyaların ümumi həcmi təxminən 5 milyard dollar olub və bunun 4,2 milyard dolları neft-qaz sektoru ilə bağlıdır.
Bu göstəricinin formalaşmasında may ayında İtaliyanın neft sektorunda fəaliyyət göstərən şirkətlərdən birində 99,85%-lik payın təxminən 3 milyard dollara alınması mühüm rol oynayıb.
Xidmətlər balansında nəqliyyat və turizm profisit yaradıb
AMB rəsmisi qeyd edib ki, Azərbaycanın xidmətlər balansı ümumilikdə kəsirlə formalaşır. Kəsirin yaranmasında neft-qaz sektorunda digər xidmətlər, xüsusilə tikinti xidmətləri əsas rol oynayır.
Bununla yanaşı, nəqliyyat xidmətləri dayanıqlı şəkildə profisit yaradan əsas istiqamətlərdəndir. İlk altı ayda nəqliyyat xidmətləri üzrə profisit təxminən 10% artaraq 941 milyon ABŞ dollarına çatıb.
Samir Nəsirovun sözlərinə görə, nəqliyyat xidmətləri üzrə müsbət saldonun formalaşmasında Orta Dəhliz üzrə daşımalarla yanaşı, Cənub Qaz Dəhlizi və Bakı–Tbilisi–Ceyhan kəməri çərçivəsində qeyri-rezidentlərə göstərilən yükdaşıma xidmətləri və əldə edilən tarif gəlirləri mühüm rol oynayır.
Turizm xidmətləri də profisitlə formalaşan istiqamətlər sırasındadır. Ölkəyə gələn turistlərin sayında cüzi azalma qeydə alınmasına baxmayaraq, ilin ilk altı ayının yekununda turizm xidmətləri balansında 47 milyon ABŞ dolları həcmində profisit yaranıb.