“Əmanətlərin sığortalanması haqqında” Qanunun 8.1.20-ci maddəsinə uyğun olaraq qorunan əmanətlər üzrə faiz dərəcəsinin yuxarı həddinin müəyyən edilməsi prosesinin səmərəliliyinin artırılması məqsədilə Əmanətlərin Sığortalanması Fondu tərəfindən yeni Metodologiya təsdiqlənib.
GDP Əmanətlərin Sığortalanması Fonduna istinadla xəbər verir ki, metodologiya Azərbaycan Respublikasının Mərkəzi Bankı ilə razılaşdırılmaqla qəbul olunub.
Metodologiyanın əsas məqsədi qorunan əmanətlər üzrə illik faiz dərəcəsinin yuxarı həddinin bazarda formalaşan real depozit faiz dinamikasına uyğunlaşdırılması, həmçinin bu həddin şəffaf və ölçülə bilən meyarlar əsasında müəyyən edilməsidir.
Aparılmış hesablamalara əsasən, 2025-ci ilin son altı ayı ərzində banklar tərəfindən fiziki şəxslərdən milli valyutada cəlb olunmuş uzunmüddətli əmanətlər (müddəti 9 aydan çox olan depozitlər) üzrə orta bazar faiz dərəcəsi azalma dinamikası göstərərək 10% təşkil edib.
Fondun Himayəçilik Şurasının 28 yanvar 2026-cı il tarixli iclasında Metodologiyanın tələblərinə uyğun olaraq bu göstəricinin üzərinə 2 faiz bəndi əlavə edilib və nəticədə milli valyutada qorunan əmanətlər üzrə illik faiz dərəcəsinin yuxarı həddinin dəyişdirilməyərək 12% səviyyəsində saxlanılması barədə qərar qəbul olunub.
Məlumata görə, Metodologiya əsasında qorunan əmanətlər üzrə faiz dərəcəsinin yuxarı həddi ilə bağlı qərarlar ildə iki dəfə qəbul ediləcək, nəticələr Fondun rəsmi internet səhifəsində açıqlanacaq və bank əmanətçiləri müvafiq qaydada məlumatlandırılacaq. Bu məsələ üzrə növbəti qərarın 2026-cı ilin iyul ayında verilməsi planlaşdırılır.
Hazırda qüvvədə olan sığortalanmış əmanətlər, o cümlədən Fondun üzvü olan banklarda milli və xarici valyutada qorunan əmanətlər üzrə illik faiz dərəcəsinin yuxarı hədləri barədə ətraflı məlumatı Əmanətlərin Sığortalanması Fondunun rəsmi səhifəsindən əldə etmək mümkündür https://adif.gov.az/az/insured-deposit