Azərbaycan Respublikasının Mərkəzi Bankının sədri Taleh Kazımovun rəhbərlik etdiyi nümayəndə heyəti Çin Xalq Respublikasına işgüzar səfəri çərçivəsində Çin Milli Maliyyə Tənzimləməsi Administrasiyasının rəhbəri, nazir Li Yunze ilə görüşüb.
GDP xəbər verir ki, görüşdə hər iki ölkənin iqtisadiyyatında baş verən son yeniliklər və həyata keçirilən islahatlar ətraflı müzakirə edilib. Tərəflər, bank və sığorta sektorlarındakı inkişaf meyilləri, risk-əsaslı nəzarət konsepsiyası və nəzarət texnologiyalarının təkmilləşdirilməsi, o cümlədən süni intellekt əsaslı həllərin nəzarət proseslərində tətbiqi mövzularına xüsusi diqqət ayırıblar.
Bundan əlavə, sığorta sektorunda innovativ yanaşmalar və yeni həllərin tətbiqi ilə bağlı təcrübə mübadiləsi aparılıb.
Görüşün əsas mövzularından biri də Azərbaycan və Çin maliyyə nəzarəti qurumları arasında əməkdaşlığın daha da genişləndirilməsi imkanları olub. Bank və sığorta sektorları arasında qarşılıqlı əlaqələrin dərinləşdirilməsi perspektivləri müzakirə edilərkən, hər iki tərəfin bu istiqamətdəki əməkdaşlığın inkişafına yüksək marağı vurğulanıb.
