Azərbaycan Respublikasının Mərkəzi Bankının sədri Taleh Kazımovun rəhbərliyi altında nümayəndə heyəti Türkiyənin İstanbul şəhərində İslam Əməkdaşlıq Təşkilatı – İqtisadi və Ticarət Əməkdaşlığı Daimi Komitəsi (OIC-COMCEC) Mərkəzi Banklarının 7-ci Forumunda iştirak edib.
GDP xəbər verir ki, Mərkəzi Bankın sədri forumun “Ödəniş xidmətləri və sərhədsiz əməliyyatlar: praktik sessiyadan nəticələr” mövzusunda sessiyasında çıxış edərək, ödəniş sistemləri və transsərhəd əməliyyatlarla bağlı mühüm məsələlərə toxunub. Taleh Kazımov ödəniş sistemlərini müasir iqtisadiyyatın əsas sütunu adlandıraraq, onların qlobal maliyyə mənzərəsində strateji əhəmiyyətini vurğulayıb.
Çıxışı zamanı o, xüsusilə transsərhəd ödənişlərin daha sürətli, şəffaf və əlçatan olması üçün zəruri olan addımları sıralayıb: “Rəqəmsal infrastruktura investisiyaların artırılması, müxtəlif ödəniş sistemləri arasında qarşılıqlı əlaqənin təmin edilməsi və beynəlxalq tərəfdaşlarla sıx əməkdaşlıq bu istiqamətdə əsas amillərdəndir.”
Taleh Kazımov həmçinin Azərbaycanda “2024-2026-cı illərdə maliyyə sektorunun inkişaf Strategiyası” çərçivəsində həyata keçirilən təşəbbüslər barədə məlumat paylaşıb. Milli ödəniş sisteminin təkmilləşdirilməsi, bazar iştirakçıları üçün əlverişli mühitin yaradılması və təhlükəsiz ödəniş xidmətlərinin təşviyi kimi sahələrdəki işlər iştirakçılara təqdim edilib.
Qeyd edək ki, OIC-COMCEC çərçivəsində mərkəzi bankların forumu 2009-cu ildən İstanbulda təşkil olunur. Bu platforma üzv ölkələrin mərkəzi bankları arasında təcrübə mübadiləsi, əməkdaşlığın gücləndirilməsi və monetar siyasət məsələlərinin müzakirəsi üçün mühüm imkan yaradır.
