«Məlum olduğu kimi, Azərbaycan Respublikası Mərkəzi Bankının “Xüsusi tənzimləmə rejiminin tətbiqi Qaydası”na əsasən hüquqi şəxslər xüsusi tənzimləmə rejimi çərçivəsində sınaq müddəti ərzində innovativ məhsul və xidmətlərini təqdim edə bilərlər. Bu əsasda hüquqi şəxslər xüsusi tənzimləmə rejimi çərçivəsində qabaqcıl beynəlxalq təcrübədə geniş yayılan rəqəmsal bank da aça bilərlər»
Bunu GDP-yə Azərbaycan Banklar Assosiasiyasının nəzdindəki “Ödəniş sistemləri və rəqəmsal bankçılıq üzrə Ekspert Qrupu”nun sədri Tamerlan Rüstəmov deyib.
O bildirib: “Ərizəçi olan hüquqi şəxs bu Qaydaların tələblərinə uyğun olaraq Azərbaycan Respublikası Mərkəzi Bankı ilə müqavilə bağladıqdan sonra sınaq müddətində rəqəmsal bank olaraq fəaliyyət göstərə bilər. Sınaq müddətində fəaliyyət göstərəcək digər təşkilatlara münasibətdə olduğu kimi, rəqəmsal banklara da tənzimləmə-nəzarət çərçivəsi tətbiq ediləcəkdir. Qeyd edilməlidir ki, sınaq müddəti 12 (on iki) aydan çox ola bilməz. Sınaq müddəti onun bitməsinə ən geci 1 (bir) ay qalmış iştirakçının əsaslandırılmış yazılı müraciəti əsasında Mərkəzi Bankın müvafiq qərarı ilə 6 (altı) aydan çox olmayan müddətə uzadıla və bununla bağlı müqaviləyə dəyişiklik edilə bilər. Müddətin bu cür uzadılması 5 (beş) ildən çox ola bilməz və sınaq rejimində ən azı 6 (altı) ay fəaliyyət göstərmiş iştirakçılara şamil edilir.”
Sınaq müddətində innovativ məhsul və xidmət üzrə tətbiq edilən məhdudiyyətlər əhatə dairəsi, müddət, əməliyyatların sayı, həcmi, istifadəçilərin sayı və digərləri əvvəlcədən müəyyən edilərək müqavilədə əks olunur.
Nəticə etibarı ilə xüsusi tənzimləmə rejimi, rəqəmsal transformasiyanın daha da uğurla tətbiq edildiyi ölkələrdə, o cümlədən Türkiyə, Sinqapur və digərlərində rast gəlinən rəqəmsal bankların ölkəmizdə də fəaliyyət göstərməsi üçün effektiv bir həll yoludur.
Müəllif: Aynur Qəniyeva