Vergi Məcəlləsinə cari ildən qüvvəyə minmiş dəyişikliklərə əsasən təsərrüfat əməliyyatları aparılan zaman malları (işləri, xidmətləri) ona təqdim edən vergi ödəyicilərinin (təchizatçının) işgüzar nüfuzunun, maliyyə vəziyyətinin, qanuni sahibliyində müvafiq malların mövcudluğunun, habelə iş və xidmətlərin təqdim edilməsi üçün müvafiq işçi və digər resurslara, bilik və bacarığa malik olmasının yoxlanılması məqsədilə həmin vergi ödəyicilərindən müvafiq təsdiqedici sənədlər əldə etmək vergi ödəyicilərinin vəzifələrinə aid edilmişdir.
Eyni zamanda, bu məqsədlər üçün həmin vergi ödəyicilərinin vergi orqanında olan məlumatlarına çıxış əldə etmək isə vergi ödəyicilərinin hüquqlarına aid edilmişdir. Azərbaycan respublikasının Nazirlər Kabinetinin 30 iyul 2024-cü il tarixli 365 nömrəli Qərarı ilə yuxarıda qeyd edilən məqsədlər üçün vergi ödəyicilərinin vergi orqanında olan məlumatlarına çıxış əldə edilməsi ilə bağlı Qaydalar təsdiq edilmişdir.
Belə ki, vergi ödəyicisi məlumatları əldə etmək üçün Dövlət Vergi Xidmətinin İnternet Vergi İdarəsi Portalında yerləşən kabineti vasitəsilə müraciət edir. Bu müraciət əsasında sorğu edilən məlumatlar 2 iş ünü ərzində məlumatları istənilən vergi ödəyicisinə elektron imzalanaraq təsdiq edilməsi üçün göndərilir. 3 iş günü müddətində məlumatları istənilən vergi ödəyicisi tərəfindən sorğu təsdiqlənmədiyi halda həmin sorğu ləğv olunur.
Sorğu edən vergi ödəyicisinə yalnız təchizatçının təsdiq etdiyi məlumatlar açıqlanır. Sorğulanmış məlumatların uçotu AVİS vasitəsilə həyata keçirilir.
Sorğular üzrə təchizatçının aşağıdakı məlumatları təqdim edilə bilər:
1. qeydiyyat tarixi;
2. uçotda olduğu vergi orqanı;
3. hüquqi şəxslərə münasibətdə qanuni təmsilçisi;
4. əgər mövcuddursa əvvəlki VÖEN-i;
5. təsərrüfat subyektləri (obyektləri) barədə məlumat (təsərrüfat subyektlərinin (obyektlərin) adı, aktivlik statusu, sahəsi və uçot kodu);
6. qeydiyyat tarixi və uçotda olduğu vergi orqanı göstərilməklə Azərbaycan Respublikasında yerləşən filial və nümayəndəlikləri;
7. riskli vergi ödəyicisi olub-olmaması;
8. vergilər, məcburi dövlət sosial sığorta, işsizlikdən sığorta, icbari tibbi sığorta haqları üzrə vaxtı keçmiş öhdəlikləri, o cümlədən faizlər və maliyyə sanksiyaları üzrə borclar;
9. əsas və əlavə fəaliyyət növləri;
10. hüquqi şəxslərə münasibətdə qeydiyyatdan keçmiş nizamnamə kapitalı;
11. təqdim edilmiş bəyannamə məlumatlarına əsasən dövriyyə məlumatları (3 ildən çox olmayaraq sorğu edilən dövr üzrə);
12. təqdim edilmiş bəyannamə məlumatlarına əsasən əsas vəsaitlərin və aktivlərin dəyəri (3 ildən çox olmayaraq sorğu edilən dövr üzrə);
13. son 24 ay üzrə həyata keçirilmiş idxal və ixrac əməliyyatlarının dəyəri;
14. cari tarixə muzdlu işçilərin sayı və bəyan edilmiş orta aylıq əməkhaqqı məbləği;
15. barəsində Dövlət Vergi Xidməti tərəfindən başlanılmış və ya həmin Xidmət tərəfindən ibtidai istintaqı aparılan cinayət işinin mövcud olub-olmaması;
16. 3 ildən çox olmayaraq sorğu edilən dövr üzrə əldə edilmiş mallara dair məlumatlar (təqdim edilmə tarixi, malın adı, kodu, miqdarı, dəyəri).