Azərbaycan Mərkəzi Bankı tərəfindən tədavülə buraxılan yubiley və xatirə pul nişanlarının satışının əlçatanlığı genişləndirilir. Vətəndaşlar artıq bu pulları daha rahat şəkildə əldə edə biləcəklər.
GDP xəbər verir ki, Mərkəzi Bankdan verilən məlumata görə, 10 iyul 2026-cı il tarixindən etibarən vətəndaşlar “Yubiley və xatirə pul nişanlarının onlayn satış sistemi” (https://coin.e-cbar.az) vasitəsilə etdikləri sifarişləri təhvil almaq üçün yeni bankları seçə biləcəklər. Sifarişlərin qəbulu üçün əvvəlki banklara əlavə olaraq, indi “TuranBank” ASC və “Bank of Baku” ASC də bu siyahıya daxil edilib.
Bununla da, qeyd olunan banklar Mərkəzi Bankın investisiya pul nişanları ilə yanaşı, həm də “Yubiley və xatirə pul nişanlarının onlayn satış sistemi”nin satış agentləri kimi müəyyən olunublar. Bu addım vətəndaşların sifariş etdikləri pulları daha əlçatan və rahat şəkildə əldə etmələrinə şərait yaradacaq.
Vətəndaşlar tədavüldə olan yubiley və xatirə pul nişanları barədə ətraflı məlumatları Mərkəzi Bankın rəsmi internet səhifəsinin “Milli pul nişanları” (https://www.cbar.az/moneymarks/coins?category=2) bölməsindən əldə edə bilərlər. Həmin bölmədə bütün mövcud pul nişanları, onların xüsusiyyətləri və tarixi haqqında məlumatlar verilir. Onlayn satış sistemi vasitəsilə isə vətəndaşlar istədikləri pul nişanlarını elektron qaydada sifariş edə bilərlər.
Qeyd edək ki, Mərkəzi Bank tərəfindən qızıl, gümüş və kupronikel yubiley və xatirə pul nişanlarının tədavülə buraxılmasının əsas məqsədi ölkəmizin ictimai-siyasi həyatında baş vermiş mühüm tarixi hadisələrin əks etdirilməsi, milli mədəni irsin və incəsənətin beynəlxalq ictimaiyyətə tanıdılması, Azərbaycanın flora və faunasının təbliği, habelə görkəmli şəxsiyyətlərin xatirəsinin əbədiləşdirilməsidir. Bu pullar həm kolleksiya əhəmiyyəti daşıyır, həm də ölkənin zəngin mədəniyyətini və tarixini əks etdirir.
Mərkəzi Bankın bu təşəbbüsü vətəndaşların yubiley və xatirə pullarına olan marağını artırmaqla yanaşı, onların bu sahədə məlumatlılığını da yüksəltməyə xidmət edir.