Epoint fintex platformasını inkişaf etdirən “Global Innovations” şirkətinin nizamnamə kapitalı 1 milyon 275 min 191,16 manata çatdırılıb. Şirkətin məcmu kapitalı isə 1 milyon 355 min 668 manat təşkil edir.
GDP xəbər verir ki,şirkətdən verilən məlumata görə, nizamnamə kapitalının artırılması Epoint-in inkişafında mühüm mərhələ olmaqla yanaşı, onun maliyyə dayanıqlığının gücləndirilməsinə, əməliyyat və maliyyə risklərinin daha effektiv idarə olunmasına, eləcə də fəaliyyətinin genişləndirilməsinə əlavə imkanlar yaradır.
Kapitalın artırılması ödəniş infrastrukturunun etibarlılığı və təhlükəsizliyinin gücləndirilməsi baxımından da əhəmiyyətli hesab olunur. Bildirilir ki, bu addım biznes müştəriləri üçün şirkətin maliyyə sabitliyinin, platforma vasitəsilə həyata keçirilən əməliyyatların etibarlılığının və pul vəsaitlərinin mövcud qanunvericiliyin tələblərinə uyğun qorunmasının göstəricilərindən biridir.
Epoint sahibkarlara və şirkətlərə ödənişlərin qəbulu və idarə edilməsi, elektron ticarətin inkişafı, satış proseslərinin və digər biznes proseslərinin rəqəmsallaşdırılması üzrə həllər təqdim edən fintex platformasıdır. Şirkət Azərbaycan Mərkəzi Bankının verdiyi lisenziya əsasında fəaliyyət göstərir.
Epoint-in baş icraçı direktoru Zeynal Kərimzadə bildirib ki, nizamnamə kapitalının artırılması yalnız maliyyə göstəricisinin yüksəldilməsi kimi qiymətləndirilməməlidir.
“Nizamnamə kapitalının artırılması yalnız maliyyə göstəricisi deyil, eyni zamanda Epoint-in biznes və fintex bazarı qarşısında uzunmüddətli öhdəliklərinin təsdiqidir. Müştərilərimizin Epoint-i ödəniş əməliyyatlarının yüksək səviyyədə təhlükəsizliyini və onların pul vəsaitlərinin qorunmasını təmin edən sabit və etibarlı texnoloji tərəfdaş kimi qəbul etməsi bizim üçün xüsusi əhəmiyyət daşıyır. Biz texnologiyaların, infrastrukturun, risklərin idarə edilməsi sistemlərinin və biznes üçün yeni rəqəmsal məhsulların inkişafına investisiya yatırmağa davam edəcəyik”, – deyə Zeynal Kərimzadə qeyd edib.
Şirkət Gürcüstandakı törəmə şirkəti vasitəsilə beynəlxalq fəaliyyətini də genişləndirir. Epoint-in Gürcüstandakı şirkəti Gürcüstan Milli Bankının verdiyi lisenziya əsasında və yerli qanunvericiliyin tələblərinə uyğun fəaliyyət göstərir.
Azərbaycan və Gürcüstanın tənzimlənən maliyyə bazarlarında fəaliyyət göstərən Epoint müasir fintex infrastrukturunun inkişafı, bizneslərin rəqəmsal maliyyə alətlərinə çıxış imkanlarının genişləndirilməsi, elektron ticarət və nağdsız ödənişlərin təşviqi istiqamətində fəaliyyətini davam etdirir.
Şirkət hesab edir ki, nizamnamə və məcmu kapital göstəricilərinin yüksəldilməsi Epoint-in maliyyə bazarındakı mövqeyinin möhkəmləndirilməsinə, biznes müştəriləri və tərəfdaşlar arasında etimadın artırılmasına, həmçinin Azərbaycanda və xarici bazarlarda gələcək inkişafı üçün maliyyə bazasının gücləndirilməsinə xidmət edəcək.