“ASAN ödəniş” sistemində istifadəçi sayı 700 minə çatır
GDP xəbər verir ki, Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin (ASAN) mətbuat xidmətindən verilən məlumata görə, “ASAN ödəniş” sistemində qeydiyyatdan keçən istifadəçilərin sayı 700 minə yaxınlaşıb.
Vətəndaşlara xidmət 10 mindən çox terminal, asanpay.az veb-səhifəsi, eləcə də “iOS” və “Android” əməliyyat sistemləri üçün mövcud olan “ASAN ödəniş” mobil tətbiqi vasitəsilə göstərilir. Terminallar təkcə Bakıda deyil, demək olar ki, bütün bölgələrdə yerləşdirilib.
Mətbuat xidmətindən bildirilir ki, portalda qeydiyyatdan keçmədən də onlayn ödəmə mümkündür. Lakin sistemdə hesab açmağın bir sıra üstünlükləri var:
- Vətəndaşlar Dövlət Yol Polisi tərəfindən tərtib edilən cərimələr və avtomobilin texniki baxış talonu haqqında operativ məlumat əldə edirlər.
- Texniki baxış və tərtib edilən protokollar barədə vətəndaşlara pulsuz SMS və email bildirişləri göndərilir.
- Sürücülər gündə üç dəfə inzibati xətalara dair protokol, yol hərəkəti və yol hərəkəti təhlükəsizliyi haqqında inzibati cərimənin mövcud olmaması barədə sübut əldə edə bilirlər.
- Vətəndaşlar onlara tərtib olunan inzibati protokola dair şikayət göndərmək imkanına malikdirlər.