Bakıda Mərkəzi Bank, Azərbaycan Fintex Assosiasiyası və “AndersenLab” şirkətinin təşkilatçılığı ilə “FinEdge: Açıq bankçılıq və açıq maliyyə” mövzusunda tədbir keçirilib.
GDP Mərkəzi Banka istinadən xəbər verir ki, tədbirdə çıxış edən Mərkəzi Bankın baş direktoru Vüsal Xəlilov bildirib ki, Açıq bankçılıq konsepsiyası ölkənin maliyyə sektorunun rəqəmsal transformasiya strategiyasının əhəmiyyətli tərkib hissəsidir. O, bu yanaşmanın daha inklüziv, şəffaf və səmərəli maliyyə ekosisteminin formalaşmasında mühüm rol oynayacağını vurğulayıb.
“AndersenLab” şirkətinin təmsilçisi Dmitri Gibert və Gürcüstan Mərkəzi Bankının nümayəndəsi Vasil Şengeliya tədbir iştirakçılarına Açıq bankçılığın inkişaf istiqamətləri barədə ətraflı məlumat veriblər.
Tədbir çərçivəsində həmçinin Açıq bankçılığın tarixi inkişaf yolu və müxtəlif ölkələrdə bu sahəni tənzimləyən hüquqi bazalar müzakirə edilib, qabaqcıl beynəlxalq təcrübələr araşdırılıb.
Qeyd edək ki, Açıq bankçılıq sisteminin tətbiqi maliyyə xidmətlərinin əlçatanlığının artırılması və innovativ həllərin inkişafı baxımından xüsusi önəm daşıyır.
