Tayvanın fond bazarı cümə günü ABŞ prezidenti Donald Trampın Tayvanı ABŞ-ın yarımkeçirici sənayesini əlindən almaqda ittiham etməsindən sonra TSMC-nin (Tayvan Yarımkeçirici İstehsalat Şirkəti) səhmlərinin düşməsi ilə geriləyib.
Tayvan Fond Birjasının kapitalizasiya ilə çəkiyə əsaslanan indeksi olan TAIEX 246,8 bənd enərək 23,152.61 səviyyəsində bağlanıb. Dövriyyə 12,2 milyard dollar olub.
Kabel və polad sənayesi səhmləri müvafiq olaraq 5,29% və 3,3% artıb. Yarımkeçirici sənaye səhmləri 2,15% azalıb, maliyyə sektoru isə 0,26% enib.
Qeyd edək ki, TSMC, Tayvanın iqtisadiyyatı üçün böyük əhəmiyyət kəsb edir və qlobal yarımkeçirici bazarında lider mövqeyə malikdir. Bu səbəbdən, TSMC-nin səhmlərinin qiymətləri dünya maliyyə bazarlarında böyük diqqət mərkəzindədir. TSMC özünün məhsullarını bazara çıxarmır, amma Apple, Nvidia, Qualcomm, AMD kimi texnoloji nəhənglər TSMC-nin xidmətlərindən yararlanır və öz çiplərini buradakı texnologiya ilə istehsal etdirirlər.