Azərbaycan Mərkəzi Bankı (AMB) ilə Slovakiya Milli Bankı arasında pul siyasəti, maliyyə texnologiyaları və maliyyə bazarlarının tənzimlənməsi sahələrində əməkdaşlığın genişləndirilməsini nəzərdə tutan Anlaşma Memorandumu imzalanıb.
GDP xəbər verir ki, sənəd Azərbaycan Mərkəzi Bankının sədri Taleh Kazımovla Slovakiya Milli Bankının sədri Peter Kazimir arasında Dünya Bankı və Beynəlxalq Valyuta Fondunun İllik Toplantıları çərçivəsində keçirilən görüşün yekununda imzalanıb.
Görüş zamanı qlobal və regional makroiqtisadi vəziyyət, maliyyə sektorunda müşahidə edilən əsas inkişaf meyilləri, eləcə də iki ölkənin mərkəzi bankları arasında mövcud əməkdaşlıq əlaqələri müzakirə olunub.
Tərəflər institusional və hüquqi əməkdaşlığın gücləndirilməsi, qarşılıqlı əlaqələrin genişləndirilməsi və mərkəzi bankçılıq sahəsində qabaqcıl beynəlxalq təcrübənin paylaşılması istiqamətində birgə fəaliyyətin əhəmiyyətini vurğulayıblar.
İmzalanmış memoranduma əsasən, iki ölkənin mərkəzi bankları arasında pul siyasəti, ödəniş sistemləri, maliyyə texnologiyaları, həmçinin bank, sığorta və kapital bazarlarının tənzimlənməsi və nəzarəti sahələrində əməkdaşlığın inkişaf etdirilməsi nəzərdə tutulur.
Sənəd, eyni zamanda, müvafiq sahələr üzrə bilik və təcrübə mübadiləsinin genişləndirilməsi, institusional əlaqələrin möhkəmləndirilməsi və qarşılıqlı əməkdaşlığın daha sistemli şəkildə həyata keçirilməsi üçün əsas yaradacaq.