İqtisadiyyat Nazirliyi yanında Dövlət Vergi Xidmətində daxili xidməti intizam qaydaları təsdiq edilib.
GDP xəbər verir ki, sənəd Xidmətin 23 oktyabr 2026-cı il tarixli əmri ilə təsdiqlənib.
Qaydalar əməkdaşların xidməti fəaliyyətində ümumi davranış normalarını, xidmətin şərtlərini, xüsusi geyim və xidməti vəsiqədən istifadəni, həmçinin həvəsləndirmə və intizam məsuliyyəti məsələlərini tənzimləyir.
Sənədə əsasən, əməkdaşlar dövlət və ictimai mənafeləri şəxsi maraqlarından üstün tutmalı, vergi ödəyicilərinə və vətəndaşlara məxsus kommersiya və vergi sirrinin, eləcə də digər fərdi məlumatların məxfiliyini qorumalıdırlar. Həmin məlumatlardan şəxsi maraqlar və xidməti fəaliyyətdən kənar məqsədlər üçün istifadə edilməməlidir.
Qaydalarda açıq-aşkar qanunazidd əmr və ya göstəriş alan əməkdaşın qanunu rəhbər tutmalı və bu barədə birbaşa yuxarı rəhbərliyə məlumat verməli olduğu göstərilib. Belə əmri icra etməmək məsuliyyət yaratmır, onu icra edən əməkdaşlar isə qanunvericiliklə müəyyən edilmiş qaydada məsuliyyət daşıyırlar.
Rəhbər vəzifəli şəxslər tabeliklərindəki əməkdaşların fəaliyyətini qiymətləndirərkən obyektiv və ədalətli olmalı, şəxsi münasibətlər zəminində himayəçiliyə və ayrı-seçkiliyə yol verməməlidirlər. Əməkdaşların xidməti fəaliyyətdən kənar digər işlərə cəlb edilməsi də yolverilməzdir.
Sənəddə intizam tənbehi tətbiq edilməzdən əvvəl əməkdaşdan yazılı izahat tələb olunması nəzərdə tutulur. Yazılı və ya şifahi xəbərdarlıq isə intizam tənbehi sayılmır. Əməkdaşların barələrində qəbul edilmiş qərarlardan yuxarı orqana və ya məhkəməyə şikayət etmək hüququ var.
Qaydaların tələblərinin pozulması intizam məsuliyyəti yaradır.