Azərbaycanda elmi fəaliyyətin maliyyələşdirilməsində dövlət büdcəsi əsas mənbə olaraq qalır. Elmi tədqiqatlara ayrılan vəsait artsa da, bu xərclərin ümumi daxili məhsulda payı aşağı səviyyədədir.
GDP xəbər verir ki, bu barədə ABB-nin təhsil və elm sektorlarına dair araşdırma hesabatında bildirilib.
Hesabata əsasən, 2024-cü ildə Azərbaycanda elmi fəaliyyətin maliyyələşdirilməsinin 82,6%-i dövlət büdcəsinin payına düşüb.
Elmi fəaliyyətə ayrılan illik vəsait əvvəlki dövrlərlə müqayisədə nominal ifadədə 16 dəfədən çox artaraq 15,9 milyon manatdan 262,5 milyon manata yüksəlib.
Bununla belə, elmi xərclərin ÜDM-də payı təxminən 0,2% təşkil edir.Müqayisə üçün, hesabatda Rusiyada elmi xərclərin ÜDM-ə nisbətinin 1%, Belarusda isə 0,6% olduğu göstərilir.
Araşdırmada qeyd olunur ki, Azərbaycan bu göstərici üzrə Qazaxıstan, Qırğızıstan və Özbəkistandan öndə olsa da, Rusiya və Belarusdan geri qalır.ABB hesab edir ki, elmi tədqiqatların maliyyələşdirilməsində özəl sektorun iştirakının və xarici maliyyə mənbələrinin genişləndirilməsi ölkənin gələcək innovasiya potensialının güclənməsinə töhfə verə bilər.
Mənbə: ABB, hesabatın 27-ci səhifəsi.

