Azərbaycanda dövlət ümumi təhsil müəssisələrinin maliyyələşdirilməsi mexanizmi dəyişdirilir.
Prezident İlham Əliyev dövlət ümumi təhsil müəssisələrində yeni maliyyələşmə mexanizminin tətbiqi ilə bağlı Fərman imzalayıb. Sənədə əsasən, 2026–2027-ci tədris ilindən etibarən dövlət məktəblərinin dövlət büdcəsi hesabına maliyyələşdirilməsi mərhələli şəkildə adambaşına maliyyələşdirmə prinsipi əsasında həyata keçiriləcək.
Yeni mexanizm çərçivəsində ümumi təhsil müəssisələrinin növləri üzrə hər bir təhsilalana düşən illik təhsil xərclərinin məbləği müəyyən ediləcək. Həmin məbləğə ümumi təhsilin ayrı-ayrı səviyyələri üzrə artım əmsalı tətbiq olunacaq.
Fərmana əsasən, Nazirlər Kabineti bir ay müddətində hər bir təhsilalana düşən illik təhsil xərclərinin məbləğini, həmçinin məktəblərin adambaşına maliyyələşdirilməsi və artım əmsallarının tətbiqi qaydalarını təsdiqləməlidir.
Elm və Təhsil Nazirliyi isə hər növbəti təqvim ili üçün yeni maliyyələşmə mexanizminin tətbiq ediləcəyi dövlət ümumi təhsil müəssisələrinin siyahısını və həmin məktəblərdə təhsil alanların sayını Maliyyə Nazirliyi ilə razılaşdıraraq müəyyən edəcək.
Maliyyə Nazirliyinə Fərmanın icrası ilə bağlı tədbirlərin dövlət büdcəsi vəsaiti hesabına maliyyələşdirilməsini təmin etmək tapşırılıb.
Sənəd “Azərbaycan Respublikasının 2022–2026-cı illərdə sosial-iqtisadi inkişaf Strategiyası”nın icrası çərçivəsində qəbul edilib.