Kapital Bank 2025-ci ilin ilk rübündən etibarən brendini Birbank adı altında tamamilə transformasiya edəcək.
GDP xəbər verir ki, bu barədə Kapital Bankın İdarə Heyətinin rəhbəri Fərid Hüseynov bankın 2024-cü ilin göstəriciləri ilə bağlı keçirdiyi mətbuat konfransında məlumat verib.
Fərid Hüseynov bildirib ki, Birbank rəqəmsallaşma, müasir texnologiyalar və süni intellekt tətbiqi ilə daha dinamik və innovativ bir brend olaraq Kapital Bank-ın yerini alacaq. “Bu dəyişiklik Kapital Bank-ın tamamilə yox olması demək deyil. Kapital Bank maliyyə institutu və korporativ brend olaraq fəaliyyətini davam etdirəcək. Lakin bütün məhsul və xidmətlər müştərilərə Birbank brendi vasitəsilə təqdim ediləcək,” – deyə o vurğulayıb.
Hazırda 3 milyondan çox aktiv müştərisi olan Birbank ölkənin ilk rəqəmsal bankı olaraq müştərilər tərəfindən yüksək qiymətləndirilir. Hüseynovun sözlərinə görə, transformasiya prosesi 2 il ərzində həyata keçiriləcək. Bu müddət ərzində Kapital Bank filialları Birbank filiallarına çevriləcək.
O, həmçinin qeyd edib ki, müştərilərin bu dəyişiklikdən daha çox faydalanacağını gözləyirlər: “Birbank daha gənc, daha dinamik, operativ və rəqəmsal bir marka olaraq müştəri təcrübəsində öz əksini tapacaq. Bütün məhsul və xidmətlər Birbank saytından və tətbiqindən əldə ediləcək.”
Kapital Bank rəhbərliyi bu addımı müasir texnologiyaların tətbiqi və müştəri məmnuniyyətinin artırılması istiqamətində atılmış mühüm bir addım kimi qiymətləndirir.