J.P. Morgan analitikləri bildiriblər ki, Tesla səhmlərinin 38%-lik EBIT itkisi və son illərin ən aşağı marjasına baxmayaraq çərşənbə günü bazar bağlandıqdan sonra 5%-ə qədər bahalaşmasının səbəbi tam aydın deyil. Bununla belə, bankın analitikləri bu artımı izah edə biləcək bir neçə ehtimal irəli sürüblər.
Onların fikrincə, Tesla rəhbərliyinin şirkətin dünyanın ən dəyərli beş texnologiya nəhəngindən – Apple, Microsoft, NVIDIA, Amazon və Alphabet – daha yüksək dəyərə sahib olacağına dair verdiyi açıqlama investorlar arasında optimizm yaradıb. Digər bir ehtimal isə Tesla-nın təkcə bir məhsulunun 10 trilyon ABŞ dollarından çox gəlir gətirə biləcəyi iddiasıdır.
J.P. Morgan analitikləri bu açıqlamaların Tesla-nın 2026-cı il üçün proqnozları ilə bağlı ola biləcəyini də qeyd ediblər. Onların sözlərinə görə, şirkətin bu dövr üçün konkret maliyyə hədəfləri açıqlanmasa da, rəhbərlik bu mərhələni “epik”, 2027 və 2028-ci illəri isə “ağlasığmaz dərəcədə yaxşı” adlandırıb.
Bununla yanaşı, analitiklər vurğulayıblar ki, Tesla səhmlərinin bu artımı şirkətin yaxın gələcəkdəki maliyyə göstəricilərinin yaxşılaşması ilə əlaqəli deyil.