42 ölkədə fəaliyyət göstərən Keepface şirkəti Çin istehsalçılarının məhsullarının beynəlxalq bazarlarda tanıdılması və satışının stimullaşdırılması üçün yeni təşəbbüsə hazırlaşır. Layihənin ilk olaraq Azərbaycanda sınaqdan keçirilməsi planlaşdırılır.
GDP xəbər verir ki, bu barədə şirkətin mətbuat üçün yaydığı məlumatda bildirilib.
Keepface-in həmtəsisçisi Vaqif Abbasov oktyabrın 17-də Çinin Quançjou şəhərində keçirilən “Nantong Foreign Investment and Trade Promotion & Matchmaking Session” tədbirində iştirak edib. Tədbirdə Çin şirkətlərinin xarici bazarlara çıxış imkanları və beynəlxalq əməkdaşlıq perspektivləri müzakirə olunub.
Yeni təşəbbüs çərçivəsində Keepface influencer marketinqi, rəqəmsal reklam və digər tanıtım kanallarını satış imkanları ilə birləşdirməyi nəzərdə tutur. Məqsəd istehsalçıların məhsullarını tanıtmaqla yanaşı, potensial müştərilərə çatmasına və satışlarının artırılmasına dəstək verməkdir.
Şirkətin təqdim etdiyi modeldə influencerlər satışın stimullaşdırılmasında iştirak edən tərəfdaşlar kimi çıxış edəcəklər. Keepface texnoloji həllər vasitəsilə influencer kampaniyalarını konkret kommersiya nəticələri ilə əlaqələndirməyi hədəfləyir.
Keepface Çinin Nantong şəhərində yerləşən Zilang Texnologiya Parkının rezidentidir və burada ofisi fəaliyyət göstərir. Şirkət yerli mövcudluğunu beynəlxalq bazar təcrübəsi ilə birləşdirərək Çin istehsalçıları ilə əməkdaşlığı genişləndirməyi planlaşdırır.
Azərbaycanda nəzərdə tutulan pilot layihə çərçivəsində Çin məhsullarının bazara çıxarılması və rəqəmsal kanallarla tanıdılması həyata keçiriləcək. Pilotun nəticələrindən asılı olaraq modelin digər ölkələrdə tətbiqi imkanları qiymətləndiriləcək.
