London fond birjası ciddi problemlərlə üzləşir. Şirkətlər burada öz bizneslərinin real dəyərini ala bilmirlər. Londonda şirkətlərin qiymətləndirilməsi digər ölkələrlə müqayisədə 40% daha aşağıdır.
Gatemore Capital Management investisiya şirkətinin idarəedici partnyoru Liad Meydar bildirib ki, “Əgər Böyük Britaniya vəziyyəti düzəltmək üçün tədbir görməsə, öz mövqelərini və aktuallığını itirməyə davam edəcək”. O qeyd edib ki, “Sadə dillə desək, şirkətlər düzgün kapital dəyəri əldə edə bilmirlər və istədikləri qiymətləndirməni ala bilmirlər”.
Bloomberg-in məlumatına görə, bu il Londonda cəmi 11 şirkət İlkin Kütləvi Təklif (IPO) həyata keçirib və ümumi olaraq 1 milyard dollar vəsait cəlb edib. Bu, 2023-cü ilin eyni dövrü ilə müqayisədə 11% daha azdır.
Panmure Liberum Britaniya konsaltinq şirkətinin strateqi Yoahim Klement vurğulayıb ki, “Əgər London Avropanın maliyyə mərkəzi statusunu qorumaq istəyirsə, ciddi islahatlar aparılmalıdır”.
Vəziyyətin ciddilyini göstərən digər fakt odur ki, təxminən 50 şirkət aşağı qiymətləndirmə səbəbindən öz səhmlərini listinqdən çıxarıb və birbaşa satışa üstünlük verib. Həmçinin Just Eat Takeaway və Flutter Entertainment kimi şirkətlər ya London listinqindən imtina edir, ya da xaricə köçürürlər.
Ekspertlər hesab edirlər ki, Britaniya investisiya bankları, London Fond Birjası və tənzimləyici orqanlar təcili olaraq vəziyyətin ciddiliyini dərk etməli və müvafiq tədbirlər görməlidirlər.